Aspas, oitavo xogador en marcar 11 goles en oito ligas consecutivas
Aspas, oitavo xogador en marcar 11 goles en oito ligas consecutivas
Entrou no selecto club do que forman parte outros sete futbolistas: Pahíño, Di Stéfano, Hugo Sánchez, David Villa, Leo Messi, Cristiano Ronaldo e Luís Suárez
O internacional español Iago Aspas, dianteiro do Celta, celebrou contra o Raio Vallecano o seu undécimo gol do curso 2022-23 e converteuse no oitavo xogador capaz de alcanzar esa cifra en oito ligas consecutivas.
O atacante galego, que esta tempada podería converterse no primeiro futbolista español en gañar cinco Trofeos Zarra, segue agrandando a súa historia e entrou no selecto club do que forman parte unicamente outros sete futbolistas: Pahíño, Di Stéfano, Hugo Sánchez, David Villa, Leo Messi, Cristiano Ronaldo e Luís Suárez.
Dos xogadores en activo no campionato español, unicamente o internacional francés Karim Benzema achégase aos estratosféricos números de Aspas. O dianteiro do Real Madrid, leva 5 Ligas consecutivas marcando dez ou máis goles, segundo datos de Afouteza e Corazón.
Aspas, ademais, é o futbolista da Liga que máis goles asina como local. Dos once que suma, nove logrounos en Balaídos. Séguelle o dianteiro do Barcelona Lewandowski con 8 no Camp Nou.