As madamas e os galáns protagonizaron o Entroido de Cobres
Esta celebración popular data do século XVIII e é unha das máis antigas da provincia de Pontevedra
Co pau mollado pola chuvia, o reto de apañar o galo na punta da vara pasou de difícil a extremo, pero o xurado deu por bo o esforzo dos participantes. Na outra modalidade de competición do Entroido de Cobres, o Galo no Río, unha clara gañadora fixo historia. Por primeira vez, proclamouse vencedora unha muller.
A orixe deste Entroido de Cobres, un dos máis antigos da provincia de Pontevedra, remóntase ao século XVIII e, ademais dos xogos populares, un dos seus sinais de identidade son os bailes de madamas e galáns.
Antes de rematar a festa a cuberto, aínda a comitiva puido cumprir coa tradición de lucir os seus bailes e os seus traxes artesanais por todas as parroquias de Vilaboa. Desde 1999, o Entroido de Cobres é Festa de Interese Turístico Galego.
