As claves do sumario do caso Leire Díez

O xuíz da Audiencia Nacional Santiago Pedraz levantou parcialmente o sumario do coñecido como caso Leire, que investiga se existiu unha trama para desbaratar actuacións xudiciais ou policiais contra o PSOE e o Goberno.

Entre os documentos, inclúese o atestado das actuacións da Unidade de Coordinación Operativa (UCO) da Garda Civil realizadas o 27 e 28 de maio na sede do PSOE e outros lugares.

Segundo a UCO, a presunta trama estaría liderada polo exsecretario de Organización do partido Santos Cerdán e coordinada pola exmilitante Leire Díez.

Segundo a UCO, o fin da trama era protexer a Sánchez

A UCO cre que o fin último da trama que presuntamente lideraban Santos Cerdán e Leire Díez era protexer os intereses postos en xogo en causas xudiciais que afectaban ao PSOE e directa ou indirectamente a certos membros do Goberno ou ao seu presidente.

O PSOE, orixe dos pagos á trama

A UCO sostén que o diñeiro para pagar os gastos do grupo presuntamente liderado por Cerdán e Díez e mais as súas necesidades loxísticas ou de persoal provén do PSOE.

"Todos os pagos dos que se puideron obter elementos neste sentido, foron autorizados ou ordenados por Cerdán", sinala a UCO no atestado.

Polo menos 43.225 euros foron destinados a Leire Díez, á parte de viaxes ou alugueiro de vehículos cuxa contía non puido ser calculada. Ao avogado Jacobo Teijelo déronlle 125.000 euros, outro dos maiores pagos.

A "fontanería" de Leire Díez e os seus pactos coa Fiscalía

Nunha conversación de WhatsApp do 19 de xuño de 2024, Leire Díez díxolle ao expresidente do F. C. Barcelona Sandro Rosell que a "fontanería" se lle daba moi ben.

A exmilitante socialista ofreceu a Villarejo explorar un pacto coa Fiscalía, segundo desvelou o avogado do excomisario. Antonio García Cabrera explicou que Díaz lle falou deste posible pacto para evitar unha multa e unha pena de cárcere pequena a cambio de facilitar información sobre o expresidente Mariano Rajoy, os exministros María Dolores de Cospedal e Jorge Fernández Díaz ou o exsecretario de Estado de Seguridade Francisco Martínez.

Os axentes tamén accederon a capturas de mensaxes entre Leire Díez e Villarejo nos que o comisario se queixaba dun boicot do fiscal que leva o seu caso e sostiña que eles eran os únicos que cumprían, ao que a exmilitante apunta: "Estou a traballar niso. Sabía que non ía ser doado, pero nada importante o é. Ti mellor ca ninguén o sabes, déixame facer".

A eventual reunión con García Ortiz

Leire Díez díxolle ao avogado de Villarejo que o daquela fiscal xeral do Estado Álvaro García Ortiz a ía recibir. Foi nunha mensaxe datada o 18 de febreiro de 2025.

Díez tamén ofreceu un pacto coa Fiscalía a Francisco Martínez, un dos acusados do caso Kitchen. Mantiveron dúas reunións cuxa gravación interveu a Garda Civil nun computador da exmilitante.

A UCO atopou mensaxes de Leire Díez sobre reunións na Fiscalía Xeral, pero non identifican quen era o seu interlocutor. Si que xeolocalizaron o seu móbil na sede da Fiscalía.

Alardeou de ter acceso ao one do Goberno"

Leire Díez presentouse como unha persoa con vínculos cos de arriba ou cos de arriba do Goberno na primeira das dúas reunións que mantivo en marzo de 2025 co comandante da Garda Civil Rubén Villalba, imputado no caso Koldo.

Na primeira reunión con Villalba, Díez limitouse a mencionar os de arriba, pero na segunda destacou que tiña acceso ao one do partido e ao "'one' do Goberno.

A UCO afirma que se refería a Sánchez cando aludía ao one, pois era a única persoa que pola súa posición podería ordenar algo a Santos Cerdán, a quen Díez se refería como S ou Santi.

Consta que o 15 de febreiro de 2025 Leire Díez lle transmitiu ao expresidente da SEPI Vicente Fernández: "Onte díxolle o one a S que me dixese que estou a facer un traballo enorme e que non me veña abaixo".

​​​​​​Os ataques a Peinado, Biedma e Alaya

O informe da UCO precisa as actuacións que levou supostamente a cabo a trama para atacar varios maxistrados, entre eles Juan Carlos Peinado, que investiga a muller do presidente do Goberno; Beatriz Biedma, que levou ao banco o irmán do presidente, e a Mercedes Alaya, que instruíu o caso dos ERE.

Sobre esta última figura, unha mensaxe de Leire Díez na que lle di a un policía en 2020 que tiñan que atopar información que comprometese a xuíza Mercedes Alaya, porque estaba a enfiar un relato para conseguir a súa morte procesual e social. "Temos que exterminar socialmente a Alaya. A dor gratuíta xa non pode ser gratis", engade.

Mercedes González borrou as súas mensaxes con Leire Díez

A UCO cre que a directora da Garda Civil Mercedes González activou o borrado automático de mensaxes de WhatsApp coa exmilitante socialista Leire Díez, coa que mantivo tres reunións polo menos entre setembro de 2024 e abril de 2025.

Para a UCO, a exmilitante socialista estaría a facer chegar a González información obtida no marco da actividade supostamente delituosa que viña desenvolvendo.

González negou que ordenase a pedimento de Leire Díez unha información interna sobre posibles filtracións da Unidade Central Operativa de casos que investiga.

A avogada de Koldo García buscaba información comprometedora

Un empresario procesado nunha trama de fraude en hidrocarburos declarou á Garda Civil que Leticia de la Hoz, avogada de Koldo García, lle propuxo beneficios procesuais se achegaba información comprometedora sobre Repsol, a UCO, o seu tenente coronel Antonio Balas ou altos cargos de Facenda.

A avogada dixo ao empresario que a persoa que podería facerlle o ofrecemento deses beneficios era Leire Díez, que estaba relacionada co Goberno a un segundo nivel.

Pano dixo que de la Hoz lle propuxo cambiar a súa versión

A empresaria Carmen Pano, quen dixo que levou 90.000 euros en efectivo á sede do PSOE, declarou a semana pasada ante a UCO que a avogada Leticia de la Hoz e un compañeiro lle propuxeron cambiar a súa versión, e preguntáronlle que quería a cambio.

Pano pediu que lle pagasen o alugueiro da súa casa (máis de 2.500 euros ao mes) e os gastos da voda da súa filla.

De la Hoz tachou de absolutamente falso que ofrecese diñeiro a Pano e presentou un escrito no que rebate cunha cronoloxía documentada o contado por Pano.

Yuste tiña que poñerse de perfil no caso David Sánchez

O ex-xefe da UCO Rafael Yuste, ao declarar como testemuña o 27 de maio, asegurou que o DAO lle ordenou poñerse de perfil nas causas que afectasen a David Sánchez, irmán do presidente do Goberno, porque no canto de ser proactivo era mellor deixar a iniciativa á autoridade xudicial.

Un computador de Cerdán, baixo chave no soto de Ferraz

A UCO incautouse o 27 de maio dun computador e sete caixas de documentación do exsecretario de organización do PSOE Santos Cerdán que estaban gardadas nunha sala baixo chave no soto 3 de Ferraz.

Segundo o atestado, tras o cesamento de Cerdán hai un ano, o partido gardou a documentación que había no seu despacho no soto 3 da sede, baixo chave.

Case 20.000 euros en billetes na casa de Gaspar Zarrías

A UCO achou 19.850 euros en billetes no rexistro do domicilio do exconselleiro de Presidencia andaluz Gaspar Zarrías o pasado mércores en Madrid. A maior parte dese diñeiro estaba en tres feixes unidos con gomas.