As casas do maior ofrecen 520 prazas gratuítas de atención diúrna en municipios pequenos

Algo máis de cincocentas persoas reciben atención diúrna nalgunha das casas do maior que hai en Galicia. A última acaba de empezar a funcionar en Camariñas. Con este e outros servizos de proximidade a Xunta quere levar os coidados aos maiores que viven en localidades pequenas, como Malpica, que está a piques de abrir un novo centro de día.

Aínda quedan algúns trámites por completar, pero a antiga Casa do Oleiro de Buño está lista para recibir os novos usuarios. Era un servizo moi agardado que finalmente se concretou grazas ao traballo conxunto da Xunta e do Concello de Malpica. O centro de día de Buño atenderá vinte persoas.

O goberno autonómico aposta por reforzar servizos de proximidade coma este, como o Programa Coidados Porta a Porta ou como o servizo de axuda no fogar, que leva coidados profesionais aos domicilios de 25.000 maiores.

A conselleira de Política Social, Fabiola visitou as instalacións malpicás e despois desprazouse a Camariñas para coñecer a segunda casa do maior do municipio. Actualmente hai abertas 105 por toda Galicia con máis de cincocentas prazas gratuítas de atención diúrna.