Aprobado o primeiro treito da A-76 que unirá Ponferrada con Ourense
O treito de máis de seis quilómetros é na provincia de León e conta un orzamento de 133,5 millóns
A actuación será entre as localidades de Villamartín de la Abadía e Requejo. Ministerio de Transportes.
O Ministerio de Transportes informou de que aprobou o proxecto de construción do primeiro tramo da autovía A-76 (Ponferrada-Ourense) entre Villamartín da Abadía e Requejo, na provincia de León, cun investimento estimado de 133,5 millóns.
A actuación, cuxa resolución será publicada proximamente no Boletín Oficial do Estado, contempla a transformación en autovía de 6,24 quilómetros da actual N-120, dentro do trazado da futura conexión entre estas dúas comunidades autónomas.
O novo tramo arrancará na conexión coa autovía A-6 en sentido Madrid e coa N-VI mediante glorietas, e finalizará na contorna do quilómetro 434 da N-120, onde se repoñerá parte desta vía para manter os accesos a localidades como A Barosa, Valiña ou El Carril.
Desde o Ministerio destacan que esta actuación permitirá mellorar a capacidade e a seguridade viaria nun corredor considerado estratéxico para as comunicacións entre Castela e León e Galicia.
Ademais, a nova infraestrutura facilitará o acceso á Plataforma Loxística do Bierzo e aos núcleos industriais da zona, á vez que contribuirá a reducir os tempos de desprazamento e mellorar as condicións de circulación para os usuarios.
