Amancio Ortega adquire un centro loxístico nos Países Baixos por 132 millóns

O fundador e primeiro accionista de Inditex, Amancio Ortega comprou un centro loxístico duns 94.000 metros cadrados situado nos Países Baixos por un total de 132 millóns de euros.

O centro de distribución atópase na cidade de Sevenum, no sueste do país e moi preto da fronteira con Alemaña, e conta con espazo para 85.000 metros cadrados de terreo industrial e outros 8.500 metros cadrados de oficinas.

A propiedade do centro pertencía á xestora Invesco e entre os principais clientes das instalacións atópanse marcas da industria téxtil como Tommy Hilfiger ou Clavin Klein, baixo a súa empresa matriz estadounidense PVH (Phillips-Van-Heusen).

Desta maneira, o fundador de Inditex continúa incrementando o seu patrimonio inmobiliario ao redor do mundo a través de Pontegadea e xa acumula hoteis, naves loxísticas, bloques residenciais ou centros comerciais, entre outras propiedades, repartidas en países como España, Estados Unidos, Francia, Canadá ou Corea.

Só en 2025 pechou dez adquisicións inmobiliarias valoradas en máis de 1.655 millóns de euros, culminando o ano coa compra dun edificio en Vancouver por 680 millóns. Deste modo, o fundador de Inditex posúe a maior inmobiliaria española, centrada na compra e xestión de grandes edificios, cunha carteira de activos inmobiliarios integrada fundamentalmente por edificios de oficinas, non residenciais.

Pontegadea conta cun modelo de negocio que se basea na adquisición e xestión de edificios non residenciais, principalmente oficinas, situados maioritariamente nos centros das principais cidades do mundo.