Airbus detecta un problema de calidade nos A320 pendente de entrega

Airbus indicou este luns que detectou un problema de calidade na fuselaxe "dun número limitado" de paneis metálicos dos avións da familia A320 de corredor único que están pendentes de entrega aos seus clientes.

Nunha mensaxe aos medios, o fabricante aeronáutico europeo, que non especificou o número preciso de aeronaves afectadas, indicou que o problema vén dun provedor e que está a inspeccionar todos os potenciais afectados. Igualmente puntualizou que sabe que só unha parte deles necesitarán algún tipo de intervención.

"Identificouse e contido a orixe do problema e todos os paneis de nova produción cumpren xa todos os requisitos", asegurou Airbus.

Este incidente chega tres días despois de que Airbus se vira envolto nunha crise ao anunciar que se ía ter que modificar o programa informático do sistema de control de arredor de 6.000 unidades en servizo dos A320 por un problema de vulnerabilidade en caso de forte radiación solar.

Este luns, o construtor aeronáutico sinalou que se conseguiu resolver ese problema cunha modificación a distancia para a inmensa maioría dos avións e que quedaban algo menos dun cento pendentes, os máis antigos, para os que ía ser necesaria unha intervención directa nos propios aparellos.

Airbus tivera que atrasar ata o verán as entregas de aparellos da súa familia estrela A320 ás compañías porque non lle chegaban os motores necesarios. A pesar de todo, ata o de agora mantivera o seu obxectivo de poñer en mans dos seus clientes 820 aeronaves. O pasado ano non logrou cumprir o seu obxectivo e quedou en 766 unidades entregadas.