Advirten da falsa sensación de seguridade que ofrecen os tests de antíxenos

Unha das consecuencias da alta incidencia da covid nesta sexta vaga é a dificultade de topar tests de antíxenos nas farmacias, sobre todo, antes das tradicionais xuntanzas familiares.

Nalgunhas boticas aínda escasean pero agora é máis doado facerse cunha destas probas. Porén, o persoal farmacéutico advirte da falsa sensación de seguridade que poden ofrecer. 

Para que o test dea positivo, o virus debe levar certo tempo no corpo. De feito, moitas veces é falso o resultado dunha proba de antíxenos feita demasiado axiña.

Por iso, consideran importante que a xente coñeza os riscos e actúe con responsabilidade cando teña sospeitas de ter contactado con algún caso positivo.