A Xunta recorrerá ante o Constitucional o decreto estatal das zonas de aceleración renovable
Asegura que a nova cartografía estatal limitará estas áreas ao 0,16 % do territorio galego e dificulta o seu desenvolvemento
A Xunta acordou recorrer ante o Tribunal Constitucional o decreto estatal que regula as zonas de aceleración renovable ao considerar que invade competencias autonómicas e limita a capacidade de Galicia para determinar onde poden situarse estas áreas.
Tras a reunión do Consello, o presidente da Xunta, Alfonso Rueda, criticou que a nova normativa estatal redefine os criterios destas zonas cun nivel de detalle que, ao seu xuízo, deixa "sen marxe de manobra" as comunidades autónomas para desenvolveren as súas competencias.
A conselleira de Medio Ambiente, Ánxeles Vázquez, explicou que o recurso conta co aval do Consello Consultivo e cuestiona varios preceptos do decreto. Segundo denunciou, a norma introduce mecanismos de control por parte do Ministerio e converte en obrigatoria unha cartografía que antes era orientativa.
Vázquez asegurou que esta delimitación reduce as posibles zonas de aceleración renovable ao 0,16 % do territorio galego, unha situación que "fai inviable" o desenvolvemento destas áreas e dificulta cumprir cos obxectivos marcados pola Unión Europea para impulsar as enerxías renovables.
A Xunta defende que o recurso busca preservar o repartimento competencial e o autogoberno de Galicia sen renunciar ao avance e transición enerxética e á loita contra o cambio climático.
