A Xunta defende que Galicia "debe ser das primeiras comunidades" en desenvolver a eólica mariña

O director xeral de Planificación Enerxética e Minas, Pablo Fernández Vila, defendeu que Galicia "debe ser unha das primeiras comunidades" nas poxas que abran para a instalación de parques eólicos mariños, a pesar das dúbidas do sector pesqueiro, que solicita unha "moratoria" e considera "irresponsable ir ás présas".

Fernández Vila explicou aos medios, tras a reunión do Observatorio da Eólica Mariña, que "hai opinións enfrontadas" entre o sector pesqueiro e o sector da industria, pero tamén hai "puntos de encontro".

Neste sentido, instou aos membros do observatorio para remitir as súas achegas antes do 24 de febreiro, xa que "considera que unhas achegas realizadas entre todos os integrantes van ser mellores que as que poida facer cada un por separado".

Fernández Vila insistiu en que é "fundamental" para todos que haxa unhas compensacións por parte dos promotores eólicos que desenvolvan os seus proxectos enerxéticos nas costas galegas, de tal modo que "todos se beneficien da implantación destes parques".

Ademais, apuntou que "tamén se poden producir sinerxías co sector pesqueiro, sobre todo efectos de mantemento e revisión dos parques unha vez que están en funcionamento".

"Queremos estar na primeira poxa porque consideramos que pode ser unha cadea de valor a efectos industriais moi significativa, pero por suposto sempre tendo en conta esa consistencia e compatibilidade do medio mariño coas actividades existentes", subliñou.

O sector pesqueiro pide unha moratoria

Neste contexto, o portavoz da Plataforma en Defensa da Pesca e os Ecosistemas Mariños, Torcuato Teixeira, solicitou unha "moratoria" porque "non se pode actuar a cegas". "Non debemos empezar a dar poxas e concesións a empresas, que poden chegar ás concesións a 50 anos, sen ter toda a información científica dispoñible", expuxo.

"Galicia, tendo o sector pesqueiro máis importante a nivel de España, non pode sacrificalo para implantar eólica mariña. Calquera implantación de eólica mariña en augas galegas debe partir respecto ao principio de precaución", salientou.

Imaxe da xuntanza do Observatorio da eólica Mariña

Teixeira asegurou que lles parece unha "irresponsabilidade" dicir que "queren ser os primeiros e que isto ten que ir ás présas e correndo" porque os traballos científicos "teñen os seus tempos e eses tempos teñen que desenvolverse".

O sector industrial defende os proxectos

Pola súa banda, o secretario xeral da Asociación de Industrias Metalúrxicas de Galicia (Asime), Enrique Mallón, sinalou que "está de acordo co sector pesqueiro en que hai que estudar e informarse ben para non arrepentirse o día de mañá das decisións tomadas".

Con todo, defendeu que Galicia debe ser unha das primeiras comunidades nas poxas.

"Temos o mellor recurso eólico mariño practicamente de España e un dos mellores da Unión Europea, porque existe xa tecnoloxía flotante, xa testada", sinalou.

Neste sentido, lembrou que a Unión Europea fixo unha "reprimenda pública en varias ocasións" por ir "demasiado lentos". A continuación, afirmou que a implantación eólica "non vai ser de golpe", senón que probablemente ata dentro de "seis ou sete anos non se vexa o primeiro parque".

"Vai ser un proceso maioritariamente lento, por tanto tamén imos ter tempo para estudar se hai algún erro para poder solucionalo", concluíu.