A Xunta busca situar a Galicia como "referente" da plena inclusión cun plan estratéxico de persoas con discapacidade

A conselleira de Política Social e Igualdade, Fabiola García, participou este mércores no acto institucional en conmemoración do Día Internacional das Persoas con Discapacidade, organizado por Cermi Galicia en Santiago de Compostela.

Durante a súa intervención, avanzou que o Goberno galego lanzará en 2026 un plan estratéxico con horizonte 2030 para situar a Galicia como "referente" na plena integración das persoas con discapacidade en todos os ámbitos das súas vidas.

A conselleira explicou que este plan estratéxico acordarase coas entidades sociais da discapacidade en Galicia e terá carácter "transversal" para incluír todos os ámbitos da vida das persoas con discapacidade: os servizos sociais, a atención sociosanitaria, a empregabilidade, a educación e formación e tamén o lecer e o deporte.

Entre os obxectivos para 2030, asegurou que se continuará realizando unha aposta decidida pola atención temperá, que hoxe dá servizo a 200 concellos, e pola creación dunha rede de atención postemperá, para os nenos e nenas que unha vez cumpridos os seis anos seguen precisando este servizo.

Ademais, incidiu en que o Goberno galego continuará impulsando o fomento da autonomía, da formación e da empregabilidade das persoas con discapacidade, sempre en colaboración coas entidades sociais.

Máis prazas en residencias e centros de día

Nesta liña de cooperación, a conselleira avanzou que a Xunta seguirá apostando por crear máis prazas de residencias e centros de día, que hoxe chegan ás 5.900, e por continuar dando estabilidade ás prazas públicas que xa existen.

Sobre isto, lembrou a recente aprobación da revisión de prezos por parte do Goberno galego, con máis de 7 millóns de euros anuais para facer fronte ao novo convenio colectivo da discapacidade.

A conselleira tamén apostou por continuar creando máis centros para a discapacidade en colaboración coas entidades sociais, un obxectivo ao que nos tres últimos anos se destinaron máis de 30 millóns de euros, e por desenvolver novos modelos de atención, con centros baseados en fomentar a vida independente e a integración na comunidade, como o que se poñerá en marcha en Friol.

Por último, e xunto á elaboración deste plan estratéxico, a conselleira destacou que outro dos principais retos para 2026 será o impulso da lei do terceiro sector social, un compromiso que xa adiantara o presidente da Xunta, Alfonso Rueda.