A Xunta activa a alerta por risco de rebordo nos ríos de Galicia-Costa

A Xunta activa o Plan Inungal de Protección Civil ante o risco de inundacións polo aumento xeneralizado do caudal dos ríos pertencentes á demarcación Galicia-Costa.

Ante as chuvias que se agardan para os próximos días e cos niveis actuais dos cursos fluviais hai risco de rebordo, por cuxa razón se deu aviso aos organismos e entidades locais para que poñan en marcha as medidas de protección necesarias.

Advirten que se debe prestar especial atención aos ríos Lérez e Gándara en Pontevedra, onde se pode chegar a niveis altos, de alerta laranxa, durante a noite deste martes.

Ante esta situación, recomendan non facer actividades, circular nin aproximarse a pé á beira dos ríos.