A xuíza procesa a parella de Ayuso por fraude fiscal e falsificación

A xuíza que investiga a Alberto González Amador, parella da presidenta da Comunidade de Madrid, Isabel Díaz Ayuso, procesouno por presunta fraude fiscal e falsificación de documentos, segundo confirmaron a EFE fontes xurídicas. 

Así consta nun auto no que a titular do xulgado de Instrución número 19 de Madrid, Inmaculada Iglesias, conclúe a investigación e dá traslado ás partes, entre elas PSOE e Más Madrid, para que formulen os seus escritos de acusación de cara ao xuízo ou soliciten o arquivo da causa.

As dilixencias abríronse por mor dunha denuncia formulada polo Ministerio Fiscal. A investigación céntrase nos indicios delituosos sobre feitos relativos ao Imposto de Sociedades correspondentes aos exercicios dos anos 2020 e 2021.

Tamén se lle procesa pola presunta comisión dun delito de falsidade documental ao achegarse unhas facturas que non se corresponden con servizos realmente prestados e achegados coa finalidade de minorar a cota tributaria a satisfacer.

Gastos ficticios, segundo a Fiscalía

A denuncia da Fiscalía sustentábase nun informe da Axencia Tributaria que expoñía que se detectaron "uns gastos ficticios baseados en facturas emitidas por diversas sociedades".

"Gastos que non se corresponden con servizos realmente prestados e todo iso coa finalidade de ingresar no erario público menor cantidade da que lle correspondía aboar polo Imposto de Sociedades dos Exercicios 2020 e 2021", recolle a denuncia do fiscal.

En 2022, a Fiscalía recibiu da Axencia Tributaria un informe referido á entidade Maxwell Cremona Ingienería e Procesos Sociedad para el Fomento del Medio do que se deduce "determinados datos e indicios sobre feitos relativos ao Imposto Sobre Sociedades correspondente aos exercicios do ano 2020 e 2021 que puidesen resultar constitutivos de delito".

O informe falaba de dous delitos contra a Facenda Pública ao resultar "unha fraude tributaria cuantificada pola Inspección de Facenda en contía superior a 120.000 euros e dun presunto delito de falsidade en documento mercantil ao achegarse unhas facturas que non se corresponden con servizos realmente prestados e achegadas coa finalidade de minorar a cota tributaria a satisfacer".