A sexta vaga da covid segue a romper barreiras en Galicia con máis de 2.500 infeccións
Sobe a presión asistencial con 73 enfermos ingresados, (+10)
Os positivos diarios son 303, cunha baixada de 58 nas últimas 24 horas
O Sergas notifica que non houbo falecidos por covid por segunda xornada consecutiva
Os indicadores da incidencia da pandemia de covid en Galicia amosan nas últimas 24 horas un certo freo no incremento das cifras. Aínda así a enfermidade ábrese paso na sexta vaga malia as cifras de vacinación.
As persoas co virus activo son 2.507, (+248) unha suba algo menor que rexistrada a xornada previa. Os contaxios diarios detectados nas probas diagnósticas , aínda que superan unha xornada máis os 300, con 303 supoñen unha redución de 58 menos respecto das 24 horas anteriores.
Aumenta a presión asistencial e hai 73 persoas hospitalizadas en Galicia por covid-19, que son 10 máis que o venres. O maior aumento de pacientes aparece en planta con 59 enfermos de coronavirus en habitación illada , oito máis, e nas UCI son agora 14 con atención especializada nestas unidades, dous máis.
O Sergas informa este domingo pola noite de que non se rexistraron falecementos por covid en Galicia nas últimas 24 horas polo que a cifra de persoas mortas como consecuencia do virus durante a pandemia mantense en 2.662.
Situación por áreas sanitarias
Segue a preocupar de xeito especial o agravamento da situación en Ourense con 642 persoas co virus activo, (+67), e tamén en Vigo ao bordo das 600 infeccións con 588, (+72). A Coruña ten 434 casos activos, (+20), en Lugo son 257 as persoas infectadas, (+33), 233 en Santiago, (+22). Na demarcación de Pontevedra son 219, (+23) e en Lugo 134, (+11).
Só as UCI covid da área de Lugo quedan libres de pacientes coa enfermidade e teñen un enfermo en agudos as de Ourense e Pontevedra.
En Galicia realizáronse ata as 18 horas do sábado 2.953.239 probas PCR para a detección do virus e administráronse 4.671.900 doses da vacina.
