A selección española feminina empata no primeiro amigable tras a polémica

A selección española feminina empatou no seu primeiro partido tras a polémica renuncia de quince xogadoras a entrar nas convocatorias vindeiras por desavinzas co técnico Jorge Vilda. 

Foi ante Suecia, en Córdoba, con apupos nalgúns momentos contra o seleccionador e as suecas tomando vantaxe cun tanto de Blomkvist no minuto 15. Xogaron as galegas Tere Abelleira, que foi titular, e Nuria Rábano, que debutaba como internacional no minuto 75 de partido.  A sete minutos para o final, logo dun córner desde a dereita, marcou sobre a mesma liña de gol Maite Oroz a pase de Irene Guerrero.  A próxima cita do combinado nacional é esta mesma semana ante os Estados Unidos.