A OTAN derruba por cuarta vez un mísil iraniano en espazo aéreo de Turquía

O Ministerio de Defensa de Turquía informou este luns de que un mísil lanzado desde Irán foi derrubado por sistemas defensivos da OTAN ao penetrar no espazo aéreo turco. 

É o cuarto episodio deste tipo desde que comezou a guerra en Irán hai un mes.

"Un mísil balístico disparado desde Irán e que entraba en espazo aéreo turco foi interceptado por defensas aéreas e antimísiles da OTAN despregadas no Mediterráneo oriental", sinala un comunicado do Ministerio turco.

A nota non especifica a rexión na que o mísil foi interceptado nin cal podería ser o seu obxectivo. 

O primeiro foi interceptado o pasado 4 de marzo 

O primeiro mísil iraniano, dirixido cara a Turquía, foi interceptado o pasado 4 de marzo sobre a provincia mediterránea de Hatay e restos do foguete interceptor caeron a uns 65 quilómetros ao este da base militar de Incirlik, utilizada pola OTAN.

Un segundo mísil foi derrubado o 9 de marzo, e un dos seus anacos impactou preto da cidade de Gaziantep, a 170 quilómetros ao este da mesma base, mentres que o terceiro episodio tivo lugar o pasado 13 de marzo.

Nese caso non se rexistraron impactos de restos, pero numerosos medios turcos aseguraron que se escoitaran sirenas de alerta antiaérea na cidade de Adana, preto de onde se sitúa Incirlik, e nas redes sociais circularon imaxes dun corpo luminoso no ceo, supostamente gravadas nesa zona.

Protestas de Ankara

Ankara protestou enerxicamente ante Teherán por estes incidentes, pero o Goberno iraniano nega que disparase mísiles cara a territorio turco e promete investigar os incidentes.

O ministro de Exteriores turco, Hakan Fidan, subliñou o 14 de marzo que o seu homólogo iraniano, Abás Araqchi, aseguraroulle que Teherán non ordenara estes ataques.