A OPEP e Rusia deciden manter recortada a súa oferta petroleira no 2023
A OPEP e Rusia deciden manter recortada a súa oferta petroleira no 2023
Consideran "necesaria" a redución pactada o 5 de outubro de bombear 2 millóns de barrís diarios menos
A alianza subliña que o recorte "foi impulsado exclusivamente por consideracións de mercado"
A alianza OPEP+, liderada por Arabia Saudita e Rusia, decidiu este domingo continuar aplicando no ano 2023 o forte recorte da produción de petróleo acordado hai dous meses.
Nun comunicado, os ministros de Enerxía e Petróleo dos 23 países da alianza reafirman que a redución do seu bombeo conxunto en 2 millóns de barrís diarios (mbd), pactada o 5 de outubro pasado, é a medida "necesaria" e "correcta".
Deciden ademais convocar para o 4 de xuño de 2023 a súa vindeira conferencia regular, segundo a nota emitida pola Organización de Países Exportadores de Petróleo (OPEP).
Con todo, destacan que o comité interno de vixilancia da alianza JMMC (polas súas siglas en inglés) reunirase cada dous meses e poderá convocar unha conferencia extraordinaria se a situación do mercado o require.
Na súa declaración final, os ministros subliñan que a polémica redución de subministracións que entrou en vigor o 1 de novembro "foi impulsada exclusivamente por consideracións de mercado".
"En retrospectiva, os participantes no mercado recoñecérona como a medida necesaria e correcta para estabilizar os mercados mundiais do petróleo", engadiron.
