A industria do metal ve compatible a eólica mariña coas actividades pesqueiras

A asociación de industrias do metal celebra a aprobación do Plan de ordenación do espazo mariño e ve nel unha oportunidade de cumprir coa estratexia de descarbonización.

Enrique Mallón Otero, secretario xeral da Asociación de Industrias do Metal e Tecnoloxías Asociadas de Galicia (ASIME) valora que suporá unha carga moi importante de traballo para o sector.

"É unha oportunidade histórica de medrar a nivel industrial e de emprego. Estamos a falar de 5.000 empregos directos que podemos gañar na próxima década se facemos unha implantación moderada segundo acaban de establecer os plans de ordenación do espazo mariño. Cremos que é unha oportunidade clara de descarbonizar e apostar pola innovación e o desenvolvemento tecnolóxico". 

Mallón entende que a eólica mariña non pon en risco as actividades marítimo-pesqueiras, que poden convivir sen problema.

"Cremos que o Observatorio da Eólica Mariña de Galicia onde está a pesca, todas as confrarías e a industria representada por ASIME, estamos chegando a conclusións que amosan claramente esa compatibilidade. 

Admite que agora hai un déficit de profesionais con cualificación no sector e que se traballa coas administracións e as empresas para formar persoal que poida incorporarse a esta industria.