A Garda Civil desarticula dous puntos de venda de droga e detén dous veciños da Pobra de Trives

A Garda Civil desarticulou dous puntos de venda de droga e detivo dous veciños do municipio ourensán da Pobra de Trives como presuntos autores dun delito contra a saúde pública e tráfico de drogas.

Segundo informaron este mércores a través dun comunicado, a investigación iniciouse hai tres meses (no marco da operación White Sky) ao ter coñecemento de que os detidos desenvolvían de xeito habitual actividades de venda de substancias estupefacientes.

As devanditas actividades levábanse a cabo nos seus respectivos domicilios e en zonas próximas a establecementos públicos do municipio, ata que ambos foron detidos o pasado 26 de maio.

Tal e como informou a Comandancia, tras practicar tres rexistros en vivendas propiedade dos detidos, incautáronse de 30 gramos de cocaína distribuída en dose, 100 mililitros de popper, 5.000 euros en efectivo e útiles e substancias empregadas para a preparación e envasado de drogas, e tamén dous vehículos que se utilizaban para o transporte e a distribución.

Segundo confirmou a Garda Civil, os detidos pasaron á disposición xudicial o pasado 27 de maio e decretouse para ambos a liberdade con medidas.