A Fiscalía pide investigar a Leire Díez por posible intento de suborno a dous fiscais

A Fiscalía Provincial de Madrid pediu investigar a exmilitante do PSOE Leire Díez, o empresario Javier Pérez Dolset e o xornalista Pere Rusiñol por un posible intento de suborno aos fiscais Ignacio Stampa e José Grinda, fiscais de Anticorrupción dos casos Villarejo e 3 %.

Así consta nun decreto en que o fiscal Juan Pablo Nieto pide ao xulgado de Madrid que abra dilixencias previas e reclame a Stampa a gravación das conversacións mantidas con Díez e Pérez Dolset.

O Ministerio Público adopta esta decisión logo que o 3 de xuño Stampa avisara a Fiscalía Superior da Comunidade de Madrid que se reuniu cos investigados o 7 de maio tras ser citado a través dun terceiro co motivo de dar desculpas de instancias gobernamentais polo trato que se lle deu na súa última etapa na Fiscalía Anticorrupción.

Segundo o decreto, nesa reunión os investigados pedíronlle a Stampa información sobre investigacións sensibles de Anticorrupción. A exmilitante do PSOE e o empresario ofrecéronlle a cambio axuda gobernamental nos litixios co Ministerio de Xustiza.

O pasado 10 de xuño Stampa ratificou o seu escrito e puxo á disposición da investigación a gravación das conversacións. Así, o fiscal Nieto acordou unir a súa denuncia coa do outro fiscal, José Grinda.

Fiscalía ve conexión entre as dúas denuncias

Grinda denunciou un posible intento de suborno ao recibir a mensaxe de Rusiñol ofrecéndolle un destino no estranxeiro a cambio de información de diferentes causas como o caso 3 %.

A Fiscalía Provincial de Madrid abriu dilixencias preprocesuais e tentou poñerse en contacto co xornalista sen éxito. Así, acordou o seu arquivo, sen prexuízo de que aparecesen feitos novos para a investigación.

Ao recibir a denuncia de Stampa, o Ministerio Público decidiu acumular ambos os casos entendendo que hai unha conexión entre os feitos de cada un.

Tras a reapertura do caso, Grinda ratificou a súa denuncia e engadiu novas circunstancias sobre os feitos, como que a oferta do xornalista viña de Leire Díez. 

Non se acumulará coa causa aberta por suborno

O decreto tivo entrada no Decanato dos Xulgados de Madrid o 21 de xullo e, segundo un auto do 30 dese mes, recaeu no Xulgado de Instrución Número 4 de Madrid.

Trátase do mesmo xulgado que xa investiga a Díez por presuntos delitos de suborno e tráfico de influencias. Tomaralle declaración o 11 de novembro polos audios en que ofrece favores xudiciais por información sensible contra membros da UCO.

Con isto, o xuíz Arturo Zamarriego rexeitou a petición da Fiscalía Provincial de Madrid de acumular os casos dos fiscais coa investigación que xa ten en marcha contra Díez ao considerar que non gardan relación cos feitos da outra denuncia.

Así, devolveu a denuncia do Ministerio Público, que podería recorrer a negativa ou pedir que o caso se envíe a repartición para que o investigue outro xulgado.