A Eurocámara valida o acordo comercial cos EUA con máis cláusulas para protexer a UE

O Parlamento Europeo aprobou este xoves o acordo comercial entre a Unión Europea e Os Estados Unidos e pediu que inclúa máis cláusulas de protección contra posibles novos aranceis ou ameazas do presidente estadounidense, Donald Trump, mesmo coa posibilidade de suspendelo.

O voto deste xoves fixa a posición do Parlamento Europeo para este acordo comercial, polo que os negociadores da Eurocámara poden agora empezar conversacións cos do Consello (os estados membro) e permitir que Bruxelas empece a implementar a súa parte do acordo con Washington. 

"Un paso crucial hoxe no Parlamento Europeo. Necesitamos o acordo UE-EUA en marcha en ambas as dúas partes, achegando certeza real para as empresas europeas e demostrando que unha cooperación xenuína dá resultados", celebrou o comisario europeo de Comercio, Maros Sefcovic, en redes sociais.

En comparanza co que Trump e a presidenta da Comisión Europea, Ursula von der Leyen, acordaron o verán pasado para frear a escalada arancelaria, os eurodeputados optaron por engadir novas cláusulas para blindar a Unión Europea no caso de que o presidente dos Estados Unidos introduza novos aranceis a países europeos ou cuestione a integridade territorial do bloque.

Armados coas leccións do que sucedeu na crise por Groenlandia no principio do ano, a Eurocámara aposta por que Bruxelas teña capacidade de suspender o acordo no seu conxunto se se volve a repetir este escenario.

Ademais, nas últimas semanas os eurodeputados incluíron unha "cláusula de entrada en vigor" que permitiría que o acordo non se aplique antes de que se confirme que se cumpren todos os elementos do mesmo.

O texto tamén prevé a extinción do acordo en marzo de 2028, momento no que as partes terán que volver sentarse para revisar os termos do mesmo, e un prazo de seis meses para avaliar as medidas que adopte Washington para reducir aranceis a derivados de aceiro e aluminio.

Está por ver cantos destes engadidos superan as negociacións cos Estados membro da UE, que non apostaron por cláusulas similares, e cal é a reacción da administración estadounidense aos cambios.

En calquera caso, o voto resolve un impás de case tres meses nos que o Parlamento Europeo conxelou ata en dúas ocasións a tramitación deste acordo: a primeira pola crise de Groenlandia e a segunda pola sentenza da Corte Suprema que anulou boa parte dos aranceis do republicano.