A EMA autoriza a vacina de Novavax, que se fabrica no Porriño

A Axencia Europea de Medicamentos apoiou este luns o uso da vacina estadounidense Novavax por ser segura e eficaz, polo que recomendou autorizar a súa licenza, converténdose na quinta vacina en superar o filtro científico europeo nesta pandemia.

Esta vacina recoméndase para adultos maiores de 18 anos, debe administrarse en dúas dose, con 21 días de diferenza, e pode ser almacenada, manipulada e distribuída a temperatura de frigorífico. O ditame da EMA é o paso previo a que a Comisión Europea outorgue a autorización de comercialización condicional, suxeita a que a farmacéutica investigue, estude e comparta datos emerxentes sobre a vacina durante os próximos anos.

Novavax mostra unha eficacia do 100 % contra a enfermidade grave ou moderada e dun 90 % contra a Covid–19 no resto dos seus estados. O estudo está feito coas variantes alfa e beta.

A compañía xa comenzou a probar a súa vacina contra a variante delta e iniciou as probas con ómicron. A Comisión ten un acordo de compra anticipada de ata 200 millóns de doses coa compañía estadounidense.