Maria Reigosa apoia unha proposta do PP en Lugo no primeiro pleno tras darse de baixa no PSOE

A edila María Reigosa, que recentemente solicitou a baixa de militancia no Partido Socialista e mantense como independente dentro do grupo municipal, rompeu este xoves no pleno do Concello de Lugo a disciplina de voto e apoiou unha proposta formulada polo Partido Popular para executar unha actuación urxente de mellora de servizos na rúa Fermín Rivera. A iniciativa saíu adiante cos votos dos edís populares e o que emitiu Reigosa.

Nun comunicado remitido aos medios de comunicación, a propia concelleira explicou o seu “voto favorable á proposición relativa á mellora de servizos” nesa rúa. Dixo que os “veciños de Lugo”, e en concreto os da rúa Fermín Rivera, merecen “respostas e responsabilidade por encima de calquera sigla”.

Reigosa indicou que o seu voto se baseou "exclusivamente no sentido común e na defensa da seguridade e do benestar das persoas que viven nesta zona", e xustificouno por "unha cuestión de responsabilidade".

O seu voto é fundamental para manter no pleno a maioría do Goberno bipartito, formado por socialistas e nacionalistas, dado que ambos os socios só suman un concelleiro máis dos que ten o Partido Popular na corporación.