A DXT prevé 438.000 desprazamentos en Galicia co gallo da festividade de Santos

A Dirección Xeral de Tráfico prevé 5.340.000 desprazamentos de longo percorrido por estrada, con motivo da festividade de Todos os Santos; 438.000 deles en Galicia.

De toda a rede viaria, 160.000 prevense na Coruña, 153.000 por Pontevedra, 69.000 por Ourense e 56.000 por Lugo, segundo a Delegación do Goberno.

Tráfico pon en marcha unha operación especial ás 15:00 horas deste venres que finalizará ás 24:00 horas do domingo, día 1 de novembro, nas comunidades onde o luns é laborable, como é o caso de Galicia.

As maiores complicacións agárdanse na tarde do venres e a mañá do sábado

As previsións de Tráfico apuntan a que a saída se distribuirá principalmente entre a tarde do venres, día 30, e a mañá do sábado, día 31.

Desde primeiras horas da tarde do venres produciranse importantes movementos de vehículos que provocarán intensidades elevadas e retencións en sentido saída dos grandes núcleos urbanos, así como nas principais vías de acceso ás zonas turísticas de costa, segunda residencia e montaña. As maiores complicacións espéranse entre as 16:00 e as 22:00 horas.

O sábado, día 31, continuará o tráfico intenso desde as primeiras horas da mañá en sentido saída dos grandes núcleos urbanos e nas estradas de acceso a zonas costeiras e de montaña. A última hora da mañá, as retencións situaranse xa nos puntos de destino.

O domingo, día 1 de novembro, produciranse numerosos desprazamentos motivados pola tradicional visita aos cemiterios.

A partir de primeiras horas da tarde, nas comunidades autónomas onde o luns non é festivo -como ocorre en Galicia- comezará o retorno podendo incrementarse as intensidades de tráfico nos principais eixos viarios de acceso ás cidades onde o luns é laborable.

Refórzanse os medios técnicos e humanos durante a fin de semana festiva

Ademais, a Dirección Xeral de Tráfico permanecerá pendente da posible intensificación do tráfico nos principais eixos viarios con orixe- destino Andalucía, como consecuencia da suspensión do servizo ferroviario cara á devandita Comunidade tras o accidente ocorrido en Urda e o previsible transvasamento de viaxantes cara ao transporte por estrada, tanto en autocares como en vehículos particulares.

Para afrontar este incremento da circulación e velar pola seguridade viaria, a DXT reforza os seus medios humanos e técnicos, como radares fixos e móbiles de control de velocidade, helicópteros, drons e cámaras para controlar o uso de móbil e do cinto de seguridade.

Ademais, paralizaranse as obras que afecten á circulación e aplicaranse limitacións a probas deportivas e outros eventos que supoñan a ocupación da calzada, ademais de restrinxir a circulación de transporte de mercadorías.