A dobre vara de medir dos árbitros indigna o celtismo
As expulsións de Moriba e Aspas contrastan coa permisividade con xogadores como Vinicius ou Endrick
Perplexidade e malestar entre o celtismo pola actuación do colexiado Cordero Vega nas Palmas. Máis tras coñecerse a acta. O club xa anunciou que recorrerá contra as dúas expulsións, que deixaron o equipo con nove xogadores en dous minutos.
No caso de Moriba, o árbitro reflicte o mesmo motivo nas dúas accións: "Derrubar un contrario de maneira temeraria na disputa dun balón". O vídeo pode axudar nas alegacións do Celta.
Conseguir a anulación do segundo cartón de Aspas pode ser máis complicado ao tratarse dunha protesta, malia ser o capitán, o interlocutor do equipo co árbitro. A acta non recolle insulto ningún, só reitera en cada amarela que foi sancionado por protestar de forma "ostensible" unha decisión súa.
Curiosamente o mesmo día, Vinicius foi tamén moi vehemente co árbitro no Bernabeu e non foi sancionado. Igual que tampouco lle amosaron un segundo cartón hai dez días ante o Alavés por estas protestas airadas diante do cuarto árbitro pola decisión de prolongar seis minutos o encontro. Nese mesmo encontro, Endrick non foi expulsado por esta patada sen balón a Mouriño. Á espera do que ditamine o comité de competición sobre Aspas e Moriba, a próxima xornada o Celta recibe o Real Madrid en Balaídos.
