A covid e a vacina provocan alteracións menstruais en preto da metade das mulleres
O CHUS investiga por que o coronavirus e a vacina afectan o ciclo menstrual de tantas mulleres
Son trastornos leves e puntuais que non deben impedir a vacinación
O complexo hospitalario de Santiago está a investigar as alteracións menstruais que sofren case a metade das mulleres despois de vacinarse contra covid ou de pasar a enfermidade. Os trastornos son leves, polo que os mesmos investigadores insisten en que deben seguir vacinándose.
O elevado número de mulleres que despois de vacinarse contra a covid ou de pasar a enfermidade acudían a consulta por alteracións na menstruación acabou por confirmar a relación causa efecto entre o virus e vacina e os trastornos xinecolóxicos.
"Unhas veces en forma de intensidade no sangrado, outras na duración, e ata sangrados en mulleres menopáusicas que había anos que non sangraban"
"Un estudo da Universidade de Estremadura con 17.000 pacientes, entre as que había aproximadamente entre un 44 e un 46 % de mullers consultadas que si que tiveran trastornos menstruais coa vacina", explica Cristina González, xinecóloga do hospital de Santiago e profesora da USC.
Desde o hospital de Santiago, que está a analizar entre 100 e 200 mulleres afectadas, insisten en que non hai motivo para deixar de vacinarse, xa que as alteracións non son graves. "Son alteracións moi puntuais e leves, duran entre dous e tres meses, catro como máximo".
"En ningunha recollemos datos preocupantes. Todas as probas que realizamos foron satisfactorias, e por iso as mulleres teñen que estar tranquilas e non ter medo a seguir vacinándose", afirma a doutora González.
Si que aconsellan ás que sofren os trastornos que acudan ao médico para descartar outras patoloxías que poidan ser máis importantes.
