O PSOE di que a Comisión de Venecia avala a legalidade da lei da amnistía

A Comisión de Venecia, órgano consultivo do Consello de Europa, avala no borrador do seu informe a legalidade da lei de amnistía. Tamén subliña que non afecta á separación de poderes, confirmaron a EFE fontes socialistas.

A Comisión de Venecia conclúe que a proposición de lei de amnistía pactada entre o PSOE, Junts e ERC cumpre con todos os requisitos de legalidade: respecto ao dereito internacional, seguridade xurídica ao definir con claridade os actos amnistiados e as excepcións, e unha tramitación que permita debate e participación.

Estas fontes socialistas sinalan ademais que a Comisión de Venecia defende que a lei de amnistía non afecta á separación de poderes, xa que a norma deixa en mans dos xuíces a amnistía dos actos concretos conforme a norma.

A Comisión de Venecia chega a estas conclusións nun borrador do seu informe, que foi encargado pola Mesa do Senado, con maioría do PP, e que elaborou tras escoitar nunha visita a principios de febreiro en Madrid a membros do Goberno, do Congreso, do Senado e do Poder Xudicial.

O PP interpreta o borrador de xeito distinto e di que cuestiona a iniciativa

 Para o Partido Popular, a Comisión de Venecia cuestiona varios puntos da lei e sostén que a Constitución Española non contempla unha amnistía.

O PP interpreta que o borrador da Comisión considera necesaria unha reforma constitucional e rexeita a tramitación mediante proposición de lei porque durante o procedemento de tramitación se deben recibir informes, contar coa participación social, escoitar e nunca facelo por urxencia.

Así mesmo, engaden as fontes, do borrador da Comisión despréndese que unha lei de amnistía requiriría de tempo para a súa redacción e, entre outras cuestións, é "indeterminada no obxecto e o tempo", polo que é contraria aos principios de seguridade xurídica e legalidade penal.

Neste sentido, o PP destaca que o órgano europeo dixo que a amnistía non pode estenderse ao futuro e que os delitos de malversación e corrupción están mal definidos no anteproxecto que está no Congreso.

Tamén sinala que unha lei desta natureza non se pode facer para persoas concretas e que busca cubrir delitos que nada teñen que ver coas tensións sociais polas que se busca unha amnistía.

A Comisión de Venecia aprobará o seu informe final sobre a lei da amnistía no pleno que comeza o vindeiro 15 de marzo.