África Gonzalez: "Agora non hai motivos para pensar que a cuarta dose é boa para todos"

A catedrática de Inmunoloxía da Universidade de Vigo, África González, explicou no "Galicia por Diante" da Radio Galega que non hai motivos científicos para poñer unha nova dose da vacina anticovid a toda a poboación.

"Non existen motivos científicos nin organismos internacionais nin país ningún que decidira poñer a vacina a todos, tampouco a OMS nin a Axencia Europea", asegurou.

"Israel, que foi o primeiro país en facer estudos sobre a cuarta dose, concluíu que si reforza a inmunidade fronte ó virus pero por pouco tempo, así que recomendou centrar os reforzos nos máis vulnerables á enfermidade", explicaba África González.

"Fagamos, pois, estudos antes de tomar decisións; o certo é que agora mesmo non hai motivos para pensar que a cuarta dose é boa para todos", concluíu.

Sobre como se vai comportar o virus nos próximos meses e as medidas que se deben tomar, a África González opina: "Hai que poñer o foco nos máis vulnerables porque é onde a infección do coronavirus é máis grave. Hai que valorar as vacinas novas, mesmo as mesturas de vacinas que poden resultar moi efectivas; en definitiva, hai que facer estudos e centrarnos en quen a necesita".

"Por outra banda, a situación da pandemia é moi diferente ás primeiras vagas grazas ás vacinas, temos unha situación bastante boa malia que Òmmicron é o virus máis contaxioso da historia, e iso é porque as vacinas funcionan", asegura a catedrática de Inmunoloxía.

"O que temos que ter claro é que a covid non é un virus estacional, circula en calquera momento e pode haber repuntas como a que houbo ao quitar as máscaras no interior, pero foi unha decisión axeitada porque xa tocaba facelo", sostén.