A Casa Branca responde ao peche áereo decretado por España: di que non necesita a súa axuda
Imaxe de arquivo de aeronaves chegando á base de Morón (Francisco J. Olmo / Europa Press)
A Casa Branca respondeu este luns a España que non necesita a súa axuda nin a de ningún outro país para a operación militar en Irán, despois de que o Goberno español ordenase o peche do seu espazo aéreo para os avións estadounidenses que participen na guerra.
"As Forzas Armadas dos Estados Unidos están a cumprir ou superando todos os seus obxectivos no marco da operación Furia Épica e non necesitan axuda de España nin de ninguén máis", declarou a EFE un funcionario da Administración de Donald Trump.
O Goberno de Pedro Sánchez, que desde o inicio da guerra prohibiu o uso das bases militases de Rota e Morón, ordenou tamén o peche do seu espazo aéreo aos voos dos Estados Unidos que participan na operación militar, segundo publicou este luns o xornal El País e confirmaron a EFE fontes de Defensa.
Esta prohibición non afecta os voos comerciais, precisaron a EFE fontes do xestor español de navegación aérea Enaire, só ás operacións aéreas militares.
Posteriormente, a ministra de Defensa, Margarita Robles, asegurou que o Goberno comunicou "clarisimamente" aos EUA desde o inicio da operación militar que España non autorizaba o uso das bases nin tampouco a utilización do seu espazo aéreo español para operacións relacionadas coa guerra.
España "non vai autorizar en ningún caso, nin o fixo nin o fai nin o fará, a utilización das bases de Rota e Morón para ir a unha guerra contra a que estamos totalmente en contra, en que non cremos, que nos parece profundamente ilegal e profundamente inxusta", incidiu Robles.
A negativa de España ao uso desas bases, de uso conxunto con Estados Unidos, regulado nun convenio bilateral, aumentou a tensión entre ambos os gobernos e fixo que o presidente estadounidense, Donald Trump, arremetese contra as autoridades españolas en numerosas ocasións.
Trump chegou a cualificar a España como un socio "terrible" e ameazou mesmo con cortar todo o comercio co país e impoñerlle un embargo, a pesar de que a política comercial española está integrada e regulada no marco da Unión Europea (UE).
