Begoña Gómez recoñece ante o xuíz que a súa asesora lle fixo algún favor

Begoña Gómez, muller do presidente do Goberno, compareceu brevemente este mércores ante o xuíz Juan Carlos Peinado para reiterar as funcións da súa asesora en Moncloa e defendeu que lle fixo algún favor en ocasións moi excepcionais, como cando enviou un correo relacionado coa cátedra que codirixía.

Durante pouco máis de cinco minutos, a muller do xefe do Executivo volveu sentar fronte ao titular do Xulgado de Instrución 41 de Madrid, que o pasado mes de agosto lle imputou un quinto delito, o de malversación.

Begoña Gómez contestou as preguntas que lle formulou o seu avogado, Antonio Camacho, nun interrogatorio dirixido a reafirmar os argumentos que este plasmou no seu recurso contra a última imputación, en que reprochou ao xuíz a súa exorbitada interpretación do Código Penal.

Na súa comparecencia (a cuarta desde que está investigada hai case ano e medio), Gómez centrouse en explicar as funcións da súa asesora, que consistían fundamentalmente en coordinar a súa axenda, equipo de seguridade e labores de protocolo.

Admitiu, como xa dixo a propia Álvarez na súa declaración, que nalgunha ocasión lle fixo un favor ao enviar algún correo relacionado coa cátedra que codirixía na Universidade Complutense de Madrid.

En febreiro de 2024, na parte final dun correo, Cristina Álvarez transmitiu unha mensaxe persoal da muller do presidente do Goberno sobre o seu desexo de que Reale seguise patrocinando a cátedra.

O letrado cuestionou que o xuíz basee a imputación de ambas por malversación nun favor que considerou unha conduta illada.

Segundo as fontes consultadas, Begoña Gómez explicou que a súa asesora realizou os labores que corresponden ao seu posto de libre designación.

A asesora de Begoña Gómez acóllese ao seu dereito a non declarar

Cristina Álvarez, asesora de Begoña Gómez, acolleuse este mércores ao seu dereito a non declarar ante o xuíz Juan Carlos Peinado, que a investiga por un presunto delito de malversación pola súa contratación en Moncloa e en relación ás funcións que presta á muller do presidente do Goberno.

Foron só uns minutos os que estivo Álvarez na sala, onde anunciou ante o titular do Xulgado de Instrución 41 de Madrid a súa decisión de non declarar por unha imputación que considera que non está fundamentada e contra a que recorreu ante a Audiencia Provincial de Madrid.

Peinado reclama os correos

O xuíz Juan Carlos Peinado pediu ao exvicerrector da Universidade Complutense de Madrid (UCM) Juan Carlos Doadrio que entregue nun prazo de 10 días "todos os correos de que dispoña na que resulte remitente ou destinataria" a asesora de Begoña Gómez, Cristina Álvarez.

Así consta nunha providencia, á que tivo acceso Europa Press, que ditou o titular do Xulgado de Instrución Número 41 de Madrid

Nesta peza separada o xuíz xa tomou declaración como testemuña ao ministro Félix Bolaños en Moncloa, ao ser secretario xeral de Presidencia do Goberno cando se nomeou a Cristina Álvarez en xullo de 2018. Despois, expuxo imputalo no Tribunal Supremo, que o rexeitou totalmente ao advertir unha absoluta falta de indicios.