Miles de persoas rexeitan na capital de Groenlandia os ataques de Trump

Miles de persoas manifestáronse este sábado en Nuuk, a capital de Groenlandia, para denunciar os intentos do presidente dos Estados Unidos de adquirir o territorio, ou anexionalo á forza, nunha das protestas máis multitudinarias que viviu na súa historia.

Na súa maioría portaban a bandeira branca e vermella, un emblema creado en 1982 pero que se converteu nos últimos días nunha expresión de orgullo nacional. Durante a marcha, que rematou no consulado dos EUA, vocearon consignas contra as ameazas de Trump.

A xente recibiu con aplausos o primeiro ministro, Jens Frederik Nielsen, berrando "Groenlandia, pertence aos groenlandeses", nunha mostra da unidade que a retórica belicista de Trump está a xerar entre a poboación do territorio autónomo integrado no Reino de Dinamarca.

Tras a chegada do mandatario, do partido social-liberal Demokraatit e presidente dun Goberno de coalición do que forman parte outras tres formacións políticas (Inuit Ataqatigiit, Siumut e Atassut), procedeuse á lectura dun poema e a un minuto de silencio, seguido do himno nacional.

Entre as pancartas dominaba a frase que se converteu no lema da resistencia: "Groenlandia non está á venda". Tamén houbo protestas noutras localidades de Groenlandia, como Qaqortoq, Aasiaat, Sisimiut e Ilulissat.

Resposta de Trump

A resposta de Trump chegou pouco despois do fin da protesta en Nuuk. Nunha mensaxe na súa rede social, asegura que é o momento de que Dinamarca devolva os "subsidios" que, ao seu parecer, os EUA lle estivo proporcionando ao país.

"A paz mundial está en xogo! A China e Rusia queren Groenlandia e non hai nada que Dinamarca poida facer. Agora mesmo só ten dúas zorras tiradas por cans como protección", engadiu.

Protestas en Dinamarca (Ritzau Scanpix/Emil Helms/via REUTERS)

Protestas en Dinamarca

Miles de persoas percorreron este sábado o centro de Copenhague ao berro de "Groenlandia non está en venda" e en contra das ameazas do presidente estadounidense, Donald Trump, de facerse con ese territorio autónomo danés.

A manifestación, convocada por organizacións de groenlandeses residentes en Dinamarca e unha ONG danesa, comezou na praza do Concello, onde interviñeron, entre outros, a alcaldesa de Copenhague, Sisse Marie Welling, e varios políticos groenlandeses.

"Non se pode comprar á xente, non se pode cambiar o mapa do mundo segundo os desexos dos poderosos", dixo Welling.

A deputada autonómica groenlandesa Pipaluk Lynge resaltou, pola súa banda, que "non é só Groenlandia, senón toda a orde mundial o que está en xogo".

As máis de 15.000 persoas, segundo os organizadores, que encheron a praza percorreron logo as rúas do centro ondeando bandeiras danesas e groenlandesas e con cánticos como "Kalaallit nunaat, kalaallit pigaat" (Groenlandia é dos groenlandeses).

A manifestación finalizou diante da Embaixada dos Estados Unidos, onde se repetiron as consignas de que Groenlandia non está á venda.

Miles de persoas participaron tamén noutras concentracións similares celebradas nas outras principais cidades danesas como Aarhus, Odense e Aalborg.