"El palacio del agua", unha novela con trama criminal no balneario de Mondariz

El palacio del agua, a segunda novela da cambadesa Lara Portas converte o Balneario de Mondariz en escenario dunha historia marcada por paixóns prohibidas, tramas criminais e diferenzas sociais nos anos 20.

A comezos do século pasado o Balneario de Mondariz competía coas vilas termais europeas pola calidade das súas augas medicinais. Foi lugar de encontro e descanso da alta sociedade, con figuras como Emilia Pardo Bazán ou Benito Pérez Galdós, que neste libro se agochan detrás de Amalia e Benedito.

"Eu como galega coñecíao polas súas augas, pero escapábame o fondo histórico que ten. Entón empecei a ver que tiña moeda propia, unha publicación... E decátome de toda a elite social, política e cultural que acudía aquí. Iso xa me dá a pista de que reunía moitos ingredientes para contar unha boa historia", relata Laura Portas, autora do libro.

No libro a vida do Gran Hotel mestúrase coa das fondas, o mercado ou as tabernas e amosa a confluencia dos dous mundos nun mesmo espazo: o da veciñanza e o servizo por un lado e o dos hóspedes ilustres polo outro.

"Quería facer unha homenaxe ao noso patrimonio e recuperar o esplendor que tivo na súa época dourada. Por iso a novela reflicte os anos 20, unha época moi convulsa, que me axuda a reflectir as diferenzas de clases sociais: entre a Galicia rural que está dos muros para fóra e o luxo que está dentro"

Unha trama criminal envolve a historia entre augas termais cunha voz feminina que protagoniza o relato. Xa está nas librarías.