Unha xuíza nega a inmunidade presidencial de Trump no caso das eleccións

A xuíza encargada do caso contra o expresidente estadounidense Donald Trump (2017-2021) por tratar de reverter as eleccións presidenciais de 2020 nega que o exmandatario estea protexido pola inmunidade presidencial, polo que a causa continúa.

A maxistrada, Tanya Chutkan, escribiu nun auto que "os expresidentes non gozan de condicións especiais na súa responsabilidade criminal federal", o que permite que a causa siga adiante.

O equipo legal de Trump argumentara que o exmandatario non pode ser xulgado por sucesos que tiveron lugar cando aínda ocupaba a Presidencia e, polo tanto, estaba protexido pola inmunidade presidencial.

Está previsto que os avogados de Trump apelen contra a decisión, o que podería atrasar o xuízo, previsto para o 4 de marzo.

Acusacións

Trump está acusado en Washington D. C. de conspiración para defraudar os Estados Unidos, de conspiración para obstruír un procedemento oficial, de obstrución e intento de obstruír un procedemento oficial e de conspiración contra dereitos.

A Fiscalía estableceu que, tras perder os comicios do 3 de novembro de 2020, o daquela presidente embarcouse nunha conspiración para "reverter os resultados lexítimos" con denuncias falsas de fraude electoral e diversas estrataxemas.

Outros procesos

O exmandatario está envolto, ademais, noutros tres procesos penais: un por inxerencia electoral no estado de Xeorxia, outro na Florida por levar da Casa Branca papeis clasificados ao abandonar o poder, e outro en Nova York polos pagos irregulares á actriz porno Stormy Daniels para silenciar na campaña de 2016 un "asunto" que tiveran no pasado.

A cuestión da inmunidade presidencial, que a defensa de Trump indicou que trataría de invocar no resto de causas penais, podería chegar ata o Tribunal Supremo do país.

Mentres, o exmandatario continúa liderando as enquisas para facerse co nomeamento dos republicanos con vistas aos comicios de 2024, nos que agarda enfrontarse de novo contra Biden.