Junts arrefría as expectativas de acordo inminente co PSOE sobre a amnistía
"Non deixaremos ningún soldado tirado", din desde a formación de Puigdemont, que non quere deixar fóra a casos que afectan os CDR, membros dos Mossos d'Esquadra e cargos da Generalitat
O acordo entre ERC e o PSOE inclúe a condonación de 15.000 millóns a Cataluña
As bases de ERC avalan apoiar a investidura
Reunión entre Cerdán e Puigdemont o luns pasado
A reunión entre o secretario de Organización do PSOE, Santos Cerdán, e o expresidente da Generalitat e eurodeputado de Junts, Carles Puigdemont, terminou este venres a media mañá sen lograr un acordo sobre o alcance da lei de amnistía.
Segundo fontes de Junts, citadas por Europa Press, a distancia está no redactado desa lei, empezando pola exposición de motivos. Pola súa banda o PSOE limítase a indicar que as conversacións continúan.
Despois de finalizar a xuntanza, Puigdemont; o secretario xeral de Junts, Jordi Turull, e a portavoz de Junts no Congreso, Míriam Nogueras, volveron reunirse nun despacho e afirmaron que se trataba dunha reunión de carácter interno. Finalmente, arredor das 13:30 horas, saíron da sala, e abandonaron o edificio.
Proba das reticencias de JxCat a pechar xa un acordo co PSOE é o escrito que remitiu o seu secretario xeral, Jordi Turull, á dirección do partido.
Nesta mensaxe, Turull descualifica o acordo alcanzado onte xoves por ERC co PSOE, segundo avanzou La Vanguardia e confirmaron a EFE fontes coñecedoras do texto.
Para Junts o pacto respecto á amnistía alcanzado por ERC e o PSOE non é suficiente. "Non deixaremos a ningún soldado tirado", asegura Turull aos seus compañeiros de dirección, e engade: "Non faremos unha amnistía para vips".
"Aquí hai moita xente que non se rendeu" e á que JxCat tenta incluír na amnistía, expón no seu escrito Turull, que pide "calma" para resistir ás presións por pechar canto antes un acordo.
Fontes de JxCat consultadas por EFE sinalan que aínda hai varios escollos por resolver nas negociacións sobre a lei de amnistía, entre eles os casos que afectan aos CDR, a membros dos Mossos d'Esquadra e a cargos da Generalitat en 2017.
Segundo Turull, "veñen horas e días de moita presión", despois de que ERC e PSOE escenificasen onte en Barcelona o seu acordo para a investidura de Pedro Sánchez.
As bases de ERC avalan apoiar a investidura
As bases de ERC avalan que a formación republicana apoie a investidura de Pedro Sánchez como presidente do Goberno, tras unha consulta interna en que participou un 43,61% da militancia e que finalizou cun apoio do 89% de votos a favor do acordo alcanzado co PSOE.
"Estás de acordo con que Esquerra Republicana vote a favor da investidura de Pedro Sánchez a cambio da lei de amnistía, a segunda fase da resolución do conflito político para abordar o referendo, o traspaso integral de Rodalies, compromisos económicos e propostas para reducir o déficit fiscal?", era o enunciado da pregunta da devandita consulta interna de ERC.
O obxectivo da consulta era que a militancia do partido dese o seu visto e prace ao acordo selado este xoves en Barcelona entre o líder de ERC, Oriol Junqueras, e o ministro de Presidencia en funcións e un dos negociadores do PSOE, Félix Bolaños.
Acordo de investidura entre ERC e PSOE
O acordo para investir presidente do Goberno a Pedro Sánchez inclúe unha lei de amnistía e a resolución de demandas históricas dos independentistas, como o traspaso do servizo de proximidade e a asunción por parte do Estado dun tramo da débeda autonómica, que se traduce entre outros puntos no compromiso de Moncloa de condonar á Generalitat ata 15.000 millóns de débeda do Fondo de Liquidez Autonómico (FLA).
O acordo mantén ademais a denominada mesa de diálogo entre o Goberno de España e a Generalitat de Cataluña e engade a creación dun "espazo de negociación" entre ambos os partidos, que contará cun mecanismo para "acompañar, verificar e realizar seguimento de todo o proceso de negociación e dos acordos aos que se chegue", mediante a designación de mutuo acordo dunha persoa "de prestixio recoñecido".
