A tregua entre Hamas e Israel prorrogarase dous días máis

O acordo de tregua e intercambio de reféns por presos entre Israel e Hamas, que comezou o venres e caducaba hoxe, estenderase durante dous días máis, segundo anunciaron o grupo islamista e o goberno de Qatar.

"O Movemento de Resistencia Islámica Hamas anuncia que se acordou cos irmáns de Qatar e Exipto prorrogar a tregua humanitaria temporal dous días máis nas mesmas condicións que a tregua anterior", informou o grupo nun comunicado difundido a través da plataforma Telegram.

O portavoz do departamento de Exteriores de Qatar, Majed al Ansari, anunciou a través da súa conta da rede social X que "o Estado de Qatar anuncia que, como parte da mediación en curso, chegouse a un acordo para estender a tregua humanitaria por dous días máis na Franxa de Gaza".

Noutras declaracións á axencia de noticias estatal qatarí, QNA, antes do anuncio da extensión da tregua, Al Ansari manifestou o desexo de Catar de que esta sirva para "alcanzar un cesamento do fogo permanente na Franxa e evitar o derramamento de sangue dos civís".

Polo de agora, o Goberno israelí non se pronunciou sobre a extensión da tregua.

Liberación de reféns

O anuncio da prórroga chegou pouco antes de que caducase o acordo, que entrou en vigor o pasado venres ás 7:00, hora local, e que estaba previsto que se estendese por catro días.

Alén dalgúns inconvenientes menores, ambas partes respectaron o pacto, que culminou coa liberación de 58 reféns cativos en Gaza e 117 presos palestinos en cárceres israelís.

Este luns está previsto que se realice o cuarto intercambio, en que Israel xa anunciou que recibiu unha listaxe dos reféns que serán liberados. Entre os 58 liberados por Hamas dende o venres, inclúense 19 estranxeiros que non formaban parte do pacto.

O acordo entre Israel e o grupo islamita foi posible grazas á mediación de Qatar, Exipto e EUA, e que prevé a liberación de 50 reféns israelís a cambio de 150 presos palestinos, todos menores ou mulleres.

Este pacto tamén inclúe a entrada de axuda humanitaria á Franxa de Gaza e unha cláusula pola que o acordo se podería estender por ata dez días, no caso de que Hamas se comprometa a entregar, cando menos, dez cativos máis por cada día adicional.

Inicio dos ataques

Israel declarou a guerra a Hamas o 7 de outubro tras un ataque do grupo islamista, que incluíu o lanzamento de máis de 4.000 foguetes e a infiltración duns 3.000 milicianos, que causaron a morte dunhas 1.200 persoas e secuestraron máis de 240 en comunidades israelís próximas á Franxa.

As forzas aéreas, navais e terrestres de Israel contraatacaron dende entón no enclave palestino, onde suman máis de 14.800 mortos, segundo autoridades palestinas, a maioría nenos e mulleres. Estímase que máis de 7.000 persoas continúan desaparecidas baixo os entullos.