Entra en vigor a pausa humanitaria acordada entre Israel e Hamas
Entra en vigor a pausa humanitaria acordada entre Israel e Hamas
As 6 era a hora fixada para o inicio dunha tregua de catro días na Franxa de Gaza
Pola tarde, Hamas tería que liberar 13 reféns e despois Israel excarcerar 39 palestinos
As horas previas á entrada en vigor da tregua foron de intensos bombardeos no enclave
![Camións con axuda humanitaria entran en Gaza polo paso fronteirizo de Rafah](https://img-g24-crtvg.flumotion.com/prog24/2023/20231124/pasorafahcamions.png)
Os primeiros camións que forman parte do convoi de axuda humanitaria polo inicio da tregua na Franxa de Gaza comezaron a entrar este venres a través do paso terrestre de Rafah, que conecta Exipto co enclave palestino, informou a televisión exipcia Al Qahera News.
A cadea mostrou en directo como os camións de axuda están a entrar polo cruzamento, un total de 60 como parte do primeiro convoi, mentres que 17 ambulancias están a esperar no lado exipcio para acceder ao enclave. O director do Servizo Estatal de Información Diaa Rashwan, que actúa como portavoz do Goberno exipcio, afirmou hoxe que 130.000 litros de combustible e catro camións de gas procedentes de Exipto entrarán diariamente na Franxa de Gaza, e tamén 200 camións de axuda humanitaria desde a entrada en vigor da tregua, que comezou hoxe ás 7:00 hora local (5:00 GMT).
Exipto seguirá recibindo grupos de nenos feridos e lesionados procedentes de Gaza para que reciban tratamento no país e estranxeiros e persoas con dobre nacionalidade do enclave, dixo Rashwan. Por primeira vez desde o comezo da agresión, a parte exipcia permitirá tamén a entrada voluntaria na Franxa de Gaza aos palestinos varados no país.
A primeira tregua entre Israel e Hamas entrou en vigor hoxe tras máis de mes e medio de guerra, como parte dun acordo para a liberación de 50 reféns a cambio de 150 presos palestinos. O cesamento do fogo durará catro días e poderase estender ata dez se o grupo palestino Hamas entrega máis secuestrados. Hoxe espérase que os primeiros 13 reféns israelís dos 240 en mans de Hamas, todos eles mulleres e nenos, sexan liberados ás 16:00 hora local (14:00 GMT), segundo anunciou Qatar, un dos mediadores da tregua.
España enviará catro toneladas de equipo médico a Egipto
España enviará a Exipto catro toneladas de material médico para axudar aos hospitais que atenden aos feridos de Gaza
Anunciouno esta mañá Pedro Sánchez nunha comparecencia xunto ao presidente exipcio e o primeiro ministro belga. A axuda canalizarase a través do Mecanismo Europeo de protección civil. Sánchez tamén insistiu en que a a tregua ten que manterse maís alá dos catro días acordados