Zapatero asegura que "xamais" fixo xestións a favor de Plus Ultra e que non ten sociedades fóra de España

 O expresidente do Goberno asegurou este martes tras a súa imputación na causa de Plus ultra que "xamais" fixo xestións ante ningunha "administración pública nin sector público en relación co rescate" da aeroliña.

"Toda a miña actividade pública e privada desenvolveuse sempre con absoluto respecto á legalidade", garantiu nun vídeo remitido aos medios despois de recibir esta mañá unha notificación da Audiencia Nacional citándoo como investigado para o próximo 2 de xuño.

Ante esa citación expresou a súa disposición "por suposto" a colaborar coa xustiza. Zapatero asegura nesa mensaxe que "xamais" tivo ningunha sociedade mercantil, "nin en España nin fóra de España", nin directamente nin a través de terceiros, nin participou en ningunha operación dese tipo.

Engade que todos os ingresos e remuneracións da súa actividade privada foron declarados vía IRPF con absoluta transparencia e legalidade.

"Quero reafirmar con toda contundencia -recalca- que xamais realicei ningunha xestión ante ningunha administración pública nin o sector público en relación co rescate de Plus ultra nin ante ningunha outra administración".

Zapatero expresa así mesmo que vai exercer o seu dereito á defensa "con toda a firmeza e toda a convicción", e avanzou que nos próximos días atenderá os medios de comunicación.