Yolanda Díaz acusa a Junts de tentar chantaxeala nas negociacións da xornada laboral
A patronal celebra a paralización da medida mentres os sindicatos anuncian novas mobilizacións
A pesar da derrota no Congreso, para Yolanda Díaz, a redución da xornada laboral está gañada na rúa e é imparable. Nunha entrevista en Onda Cero, a ministra de Traballo volveu criticar a Junts pola actitude "de chantaxe" que mantivo durante as negociacións. "Teño límites e non vou entregar o meu país", afirmou a tamén vicepresidenta segunda.
Para o PP, onte volveuse demostrar que o Goberno non ten maioría no Congreso nin "capacidade para gobernar", segundo a súa vicesecretaria de Rexeneración Democrática, Cuca Gamarra.
Ademais, di o vicesecretario popular de Facenda, Juan Bravo, o executivo está dividido, porque "o señor Sánchez, onte, mentres nós votabamos, estaba coa súa muller na estrea dunha película".
A vicepresidenta restoulle importancia á ausencia do presidente do hemiciclo e asegurou que non se sentiu "soa". Yolanda Díaz intentará de novo que se aprobe a medida, e conta co apoio da ala socialista. Segundo a ministra de Seguridade Social, Elma Saiz, van "seguir traballando da man dos axentes sociais".
Os axentes sociais están divididos nesta cuestión. A patronal celebra a paralización. Segundo Lorenzo Amor, presidente de ATA, "foi un respiro importante para máis de 900.000 autónomos e pequenas empresas".
Mentres, os sindicatos anuncian máis mobilizacións para presionar a patronal, os partidos que votaron en contra e tamén o Goberno. CCOO e UXT reclaman que se aprobe o novo rexistro horario no próximo Consello de Ministros.
