Xulgan por maltrato animal o home acusado de violar unha vaca en Castro de Rei
O gandeiro que presentou a denuncia lamenta que non se citase a declarar os axentes da Garda Civil ante os que recoñeceu os feitos
A defensa pediu a libre absolución por falta de probas
A Fiscalía sostén que hai indicios suficientes para vinculalo cun delito leve de maltrato animal
Os feitos tiveron lugar na madrugada do 29 de xuño na explotación que Marcos Salgado ten na aldea de Triabá, en Castro de Rei. Foi a súa nai a que se decatou de que algo pasaba na corte polo ruído que facían as vacas. Cando se asomou viu un home detrás dunha delas, atada polo pescozo e o rabo, e subido a un banco. Así o relatou na vista oral que se celebrou no xulgado de instrución número un de Lugo e que ratificou o propio gandeiro denunciante, quen ademais dixo que o acusado lle recoñecera que sometera o animal a unha práctica sexual.
"Sabía que cando mo dixo a min na casa non valía para nada", dixo o denunciante
Trala celebración do xuízo non ocultaba o seu descontento: "Non estou satisfeito, porque me parece unha tomadura de pelo, ao ser a miña palabra contra a del, ao non haber unha cámara que o ratifique, que non se cite o garda civil ante o que recoñeceu os feitos. Había tres gardas civís cando dixo a verdade. Sabía que cando mo dixo a min na casa non valía para nada.
"Animeime a presentar porque sabía que esta persoa ía seguir andando polas festas e tratando con nenos pequenos".
O acusado estaba de paso na zona porque traballa nunha das atraccións das festas de San Pedro, que se celebraban preto da granxa. O denunciante identificouno no propio campo da festa. Hoxe non se presentou ao xuízo.
"O meu cliente non cometeu os feitos", di a letrada da defensa.
A súa letrada, María Núñez Torrón, pediu a nulidade do recoñecemento dos feitos por non ser citado ao xuízo o axente da Garda Civil como testemuña, e solicitou a súa absolución.
"A defensa mantén que non quedan acreditados os feitos, que o meu cliente non cometeu eses feitos; e para o hipotético caso de que si os cometese, tal e como está regulado ese delito no Código Penal, non sería constitutivo de delito, tal e como está tipificado".
Para o ministerio fiscal, os feitos quedaron acreditados
Para o ministerio público, os feitos están acreditados coas declaracións do denunciante e a testemuña e sostén que hai indicios suficientes para condenar o acusado por un delito leve de maltrato animal, para o que solicita unha multa de 360 euros (dous meses de multa a razón de seis euros por día) ou traballos en beneficio da comunidade, así como ao pago das costas. O denunciante non pediu indemnización.
