Volve o Domingo Fareleiro ao Entroido de Xinzo de Limia
Volve o Domingo Fareleiro ao Entroido de Xinzo de Limia
Tras un ano de pandemia, a vila limiá recupera o seu ciclo do Entroido, o máis longo da Península
A veciñanza encheu de novo a Praza Maior de fariña e farelos, como manda a tradición
Noutras vilas como Laza, Verín e Maceda comezaron saír os Peliqueiros, os Cigarróns e os Felos
Con menos intensidade que antes da pandemia pero coas mesmas ganas e sentimento, este domingo comezou o Entroido co ciclo máis longo da Península. Co Domingo Fareleiro, a vila de Xinzo de Limia arranca a súa festa máis agardada.
Volveu o entroido á Praza Maior de Xinzo, no Domingo Fareleiro. Un ano despois volve tamén a alegría e a retranca. Había moitas ganas de botar fóra ese sentimento.
"Acá nesta vila o Entroido é un sentimento".
"Un ano máis e morremos sen isto, porque é moi noso".
"A nós encántanos e tiñamos moitas ganas de que xa empezase o Entroido".
"Despois de tanto tempo, nós que somos entroideiras, isto xa era un fervello, estamos moi emocionadas, hoxe é un día moi grande para nós".
Un día grande do que puido gozar a veciñanza con distancia e máscaras. Purificándose coa fariña e os farelos. Así comezan en Xinzo o seu ciclo do Entroido, unha festa declarada de Interese Turístico Internacional.
Estes días tamén comezaron co Entroido noutras vilas e localidades da provincia de Ourense. Saíron xa os Peliqueiros e os folións en Laza, os Cigarróns en Verín, e os Felos de Maceda. Este ano vai haber Entroido, non será coma sempre, pero é o que todo o mundo estaba agardando.
En Xinzo o vindeiro domingo será o Domingo Oleiro, non hai actos oficiais organizados polo Concello nin a Comisión do Entroido, pero a veciñanza sairá á rúa a cumprir coa tradición.
Despois dun ano a veciñanza tiña moitas ganas da súa festa máis agardada
