Os EUA capturan a Maduro tras "un ataque a grande escala" en Venezuela

O Exército dos Estados Unidos capturou o presidente de Venezuela, Nicolás Maduro, e á súa muller, a primeira dama Cilia Flores, durante unha operación militar executada esta madrugada en distintos puntos do país caribeño.

O propio Donald Trump confirmou en redes que levaran a cabo "con éxito un ataque a grande escala en Venezuela e o seu líder, o presidente Nicolás Maduro, que foi, xunto coa súa muller capturado e sacado por aire do país".

"A operación foi realizada en conxunción coas forzas da orde dos Estados Unidos", asegurou Trump nunha mensaxe en Truth Social.

De acordo coa CNN, o Executivo de Trump comezou a informar do operativo aos líderes do Congreso cando xa estaba en marcha. Isto supón unha ruptura cos procedementos das Administracións anteriores, que sempre notificaban antes do inicio.

Rexistráronse bombardeos na capital, Caracas, e nos estados de Miranda, Aragua e La Guaira. Segundo fontes consultadas por Fox News, a operación militar nocturna implicou unha gran despregadura de helicópteros Chinook e outros activos das unidades especiais.

As Forzas Aéreas dos Estados Unidos emitiron un aviso oficial que prohibe a todas as aeronaves circular polo espazo aéreo de Venezuela.

"Operación brillante"

Segundo fontes da Administración dos EUA, Trump deu luz verde aos ataques militares hai uns días, tras aumentar a presenza militar fronte ás costas do país e pedirlle varias veces a Maduro que abandonase o poder.

Nunha breve entrevista co diario The New York Times, desde a luxosa mansión onde o presidente pasou as vacacións do Nadal, Trump dixo que foi "unha operación brillante".

"Houbo moita planificación e moita xente e militares moi bos".

Pouco despois, nunha declaración á cadea Fox News, confirmou que houbo "varios feridos" pero ningunha vítima mortal. Asegurou que Maduro estaba "nunha especie de fortaleza" que contiña unha habitación de seguridade "con portas de aceiro" pero que "non fixo falta entrar nesa zona".

"Os militares dixéronme que non hai outro país na Terra capaz de realizar unha manobra así. Vino coma se estivese a ver un programa de televisión. Foi algo incrible", manifestou á cadea conservadora.

Tamén desvelou que o mandatario chavista e a súa dona están retidos nun barco de asalto USS Iwo Jima en augas do Caribe e viaxan cara aos Estados Unidos para sentar no banco dos acusados por narcotráfico.

De feito, publicou unha foto do presidente esposado e cos ollos e oídos tapados.  Detrás, pode verse un axente cun chaleco da Administración de Control de Drogas (DEA).

Catro cargos

O fiscal xeral estadounidense, Pam Bondi, asegurou que un tribunal federal de Nova York vai xulgar o presidente de Venezuela e a primeira dama, Cilia Flores.

Neste sentido, lembrou a acusación formal que pesa desde o ano 2020 sobre o mandatario por catro cargos, entre eles o de conspiración para o narcoterrorismo.

Proba de vida

A vicepresidenta do país caribeño, Delcy Rodríguez, dixo descoñecer o paradoiro do presidente e da súa dona e esixiulle ao Goberno de Trump unha proba de vida de ambos os dous.

Nun contacto telefónico coa canle estatal venezolana de televisión, a VTV, condenou os ataques e asegurou que hai vítimas civís e militares.

"Condenamos este xeito brutal, salvaxe, de agresión contra o noso pobo que cobrou a vida de funcionarios militares, que se converten en mártires da nosa patria, e de inocentes venezolanos civís", expresou.

O fiscal xeral de Venezuela, Tarek William Saab, denunciou o "secuestro" do líder chavista e responsabilizou o Executivo dos EUA do que poida pasar coa súa vida.

O Goberno de Venezuela solicitou unha reunión de emerxencia do Consello de Seguridade da ONU, a través dunha carta dirixida ao seu presidente, o embaixador de Somalia Abukar Dahir Osman, entregada tamén ao secretario xeral da ONU, António Guterres.

Nunha aparición na VTV rodeado de militares, o ministro do Interior de Venezuela, Diosdado Cabello, fixo un chamado á calma e instou os organismos internacionais a pronunciarse sobre este "masacre" que tacha de "criminal e terrorista".

"Moita calma, que ninguén caia no desespero, que ninguén caia en facilitarlle as cousas ao inimigo invasor, ao inimigo terrorista que nos atacou covardemente, que ninguén lle facilite as cousas", engadiu o considerado número dous do chavismo.

"Gravísima agresión militar"

Horas antes, o Goberno de Maduro denunciaba nun comunicado unha "gravísima agresión militar" estadounidense en localidades civís e militares dos estados de Miranda, Aragua, La Guaira e na capital.

"A República Bolivariana de Venezuela rexeita, repudia e denuncia ante a comunidade internacional a gravísima agresión militar perpetrada polo goberno actual dos Estados Unidos contra o territorio e a poboación venezolanos nas localidades civís e militares da cidade de Caracas, capital da República, e nos estados de Miranda, Aragua e La Guaira".

"Tal agresión ameaza a paz e a estabilidade internacional, concretamente de América Latina e o Caribe, e pon en grave risco a vida de millóns de persoas", asegurou no texto oficial.

O obxectivo, segundo sinala, é "apropiarse dos recursos estratéxicos de Venezuela, en particular, do seu petróleo e os seus minerais, tentando quebrar pola forza a independencia política da nación. Non o lograrán".

"Tras máis de douscentos anos de independencia, o pobo e o seu Goberno lexítimo mantéñense firmes na defensa da soberanía e do dereito inalienable de decidir o seu destino".

O Executivo bolivariano amósase convencido de que "o intento de impoñer unha guerra colonial" para "forzar un cambio de réxime" fracasará coma en ocasións anteriores.

O presidente do país, Nicolás Maduro, declarou o estado de conmoción exterior en todo o territorio nacional e dixo que se reserva o dereito a exercer a lexítima defensa ante a "agresión" dos Estados Unidos.

"O presidente Nicolás Maduro asinou e ordenou a implementación do decreto que declara o estado de conmoción exterior en todo o territorio nacional para protexer os dereitos da poboación, o funcionamento pleno das institucións republicanas e pasar de inmediato á loita armada", prosegue.

Do mesmo xeito, ordenou a despregadura do "Comando para a Defensa Integral da Nación e dos Órganos de Dirección para a defensa Integral de todos os estados e municipios do país". 

Explosións con sobrevoo de avións

Durante a madrugada, escoitáronse varias explosións con sobrevoo de avións en Caracas, nun momento no que Venezuela denunciara "ameazas" do Goberno do presidente dos Estados Unidos, Donald Trump, pola despregadura militar no Caribe e as advertencias de ataques terrestres.

En redes sociais circulan imaxes de explosións en varios puntos da capital venezolana, onde houbo apagamentos de luz, mentres algúns usuarios informaron de detonacións no forte militar principal do país, Fuerte Tiuna, ao oeste da cidade, e na base militar de La Carlota.

"Fuerte Tiuna está a estoupar", escóitase dicir á xente que grava vídeos desde as súas xanelas.

Á procura de vítimas

O ministro de Defensa de Venezuela, Vladimir Padrino López, tamén denunciou a agresión con mísiles desde helicópteros estadounidenses contra zonas civís de Caracas, así como noutros lugares do país, e indicou que están á procura de persoas feridas ou mortas.

"Esta invasión representa a ultraxe máis grande que sufriu o país que responde á insaciable cobiza dos nosos recursos estratéxicos", dixo nun vídeo difundido en redes sociais.

Segundo dixo, lanzaron mísiles e foguetes nun ataque que cualificou de "ruín e covarde". Nese sentido, pediu evitar "o caos e a anarquía que -advertiu- son armas tan letais como as bombas".

"Atacáronnos, pero non nos dobregarán", engadiu.

Rede de narcotráfico

O presidente Trump advertiu en novembro sobre a posibilidade de ataques en territorio venezolano no medio da súa campaña contra Venezuela e o Goberno de Nicolás Maduro, ao que acusa de liderar unha rede de narcotráfico.

O venres pasado, o presidente estadounidense, Donald Trump, anunciou un ataque contra unha "grande instalación" dentro da súa campaña contra este presunto cartel da droga, aínda que non especificou se foi dentro do territorio.

O luns, Trump indicou que o bombardeo produciuse nun peirao, pero tampouco precisou a zona xeográfica. Segundo informou o New York Times, a Axencia Central de Intelixencia (CIA) dos EUA levou a cabo a semana pasada un ataque con drons contra unha instalación portuaria en Venezuela.

O xoves, Maduro dixo nunha entrevista que o sistema defensivo do seu país "garantiu e garantirá a integridade territorial" venezolana, ao ser consultado sobre este presunto ataque terrestre, que non confirmou nin desmentiu.