Varias autonomías consideran insuficientes as novas medidas anunciadas por Sánchez

Varios presidentes autonómicos consideran escasas as medidas anunciadas por Pedro Sánchez na Conferencia de Presidentes ante a explosión de contaxios, que onte bateron un novo récord: máis de 60.000 novos positivos nun só día, un novo máximo histórico, elevan a incidencia a 784 casos por 100.000 habitantes.

Notificáronse tamén 50 falecidos e a ocupación nas UCI achégase ao 16 %, con Cataluña á cabeza, onde superan un 30.

E de feito, o presidente catalán foi un dos máis críticos coas medidas de Sánchez por consideralas insuficientes ante o risco de colapso do sistema sanitario. 

Tamén saíu decepcionado o lehendakari. Quería medidas coordinadas e máis estritas, como o peche de actividades á unha.

En cambio, outras comunidades, Cantabria, A Rioxa, Castela-A Mancha ou Valencia si consideran suficientes as medidas de Sánchez. Avogan pola prevención fronte ás restricións.

Tamén hai comunidades que discrepan do uso da máscara en exteriores. Aragón ve a medida prescindible e tamén Madrid.

Outras comunidades do PP, como Andalucía, si consideran unha boa medida a máscara en exteriores, pero cren que chega tarde.