Inundacións, rescates e problemas no transporte en Aragón, na Comunidade Valenciana e en Cataluña

A borrasca que sacode ao leste do país e que provocou cancelacións de voos, cortes de vías, inundacións, suspensión de clases e rescates segue sacudindo á Comunidade Valenciana, que manterá hoxe a alerta vermella por risco extremo no litoral valenciano por choivas de ata 200 litros por metro cadrado en doce horas.

Hoxe luns manterase a alerta vermella ata a madrugada no litoral da provincia de Valencia; risco extremo que xa non afecta a Tarragona nin Castelló, que baixaron o aviso a nivel laranxa.

A partir de mañá prevese que a borrasca se traslade cara a Baleares, elevando a alerta no arquipélago a nivel laranxa, con risco importante por choivas "moi intensas" que poderían acumular 50 litros nunha hora ou máis de 100 litros en 2-3 horas.

Durante a pasada madrugada, os bombeiros de Castelló e Valencia realizaron varios rescates de vehículos atrapados polas choivas-  Un total de 239 municipios da Comunidade Valenciana, suspenderon este luns as clases. 

En canto ao transporte, a choiva das últimas horas provocaron atrasos en voos e a cancelación de catro deles no aeroporto de Valencia; tamén houbo atrasos no tráfico ferroviario.

En Castelló os bombeiros realizaron oito intervencións durante a madrugada por mor dunhas choivas que descargaron máis de 150 litros por metro cadrado nalgúns puntos da provincia. Dous dos servizos centráronse no rescate de persoas atrapadas no interior dos seus vehículos por acumulación de auga.

Polo momento, prevalece a normalidade nos principais encoros e leitos de zonas afectadas polas choivas; a Confederación Hidrográfica do Xúcar (CHX) informou este luns de que non se produciron aumentos significativos de caudal, aínda que pediu "precaución" porque a situación meteorolóxica podería empeorar nas próximas horas.

En Aragón, o río Huerva alcanzou durante a pasada madrugada o nivel vermello de alerta de crecida do caudal ao seu paso por Zaragoza, cun pico de 2,63 metros ás 04:00 horas da madrugada, unha situación que se prolongou ata as 09:30 horas, cando descendeu o aviso a situación amarela, segundo informa a Confederación Hidrográfica do Ebro (CHE). Ante a intensa choiva en Aragón, o 112 xestionou na medianoite 126 incidencias e recibiu ata 1.664 chamadas, a maioría por auga en garaxes, rúas e estradas ademais de inundacións con cortes de tráfico e caída de pedras e arboreda.

A madrugada deste luns transcorreu sen incidencias destacadas en municipios da provincia de Valencia afectados pola dina do pasado 29 de outubro, aínda que as precipitacións provocaron o rebordamento do barranco da Saleta, en Aldaia, a "subida puntual" do barranco do Poio en Paiporta ou o desprendemento de pedras nunha estrada en Buñol.

En Cataluña, Protección Civil enviou alertas aos móbiles de zonas afectadas pola borrasca pedindo extremar a precaución ante posibles choivas torrenciais. Pediuse á poboación evitar desprazamentos innecesarios, actividades ao aire libre e atravesar barrancos, rises e zonas inundables. Víronse afectados uns 25.000 alumnos dun centenar de centros escolares das comarcas no sur de Tarragona.