Un segundo ataque en Xerusalén deixa dúas persoas feridas
Un segundo ataque en Xerusalén deixa dúas persoas feridas
É a segunda agresión destas características no leste ocupado da cidade en menos de 24 horas
Novo ataque no Xerusalén leste ocupado en menos de 24 horas. Desta volta, unha agresión con arma de fogo provocou dous feridos no asentamento Cidade de David, segundo a información preliminar dos servizos de emerxencia Magen David Adom (MDA).
"O sospeitoso do tiroteo foi neutralizado", informou a Policía nun comunicado no que confirmou este novo ataque, preto do barrio palestino de Silwan, cualificado de "terrorista", como se refiren en Israel a toda agresión cometida por palestinos.
Un amplo dispositivo policial despregouse no lugar e xa hai aberta unha investigación en curso, engadiron as forzas de seguridade.
"Chegamos rapidamente á escena e vimos dúas vítimas de disparos. Un home de 47 anos e un home de 23. Estaban completamente conscientes e tiñan feridas de bala na parte superior do corpo. Trasladámolos rapidamente ás unidades de terapia intensiva e levámolos ao hospital Shaare Tzedek. O home máis novo está en estado grave e o outro en estado de moderado a grave", informou un dos paramédicos do servizo MDA.
Onte á noite, un palestino matou sete israelís ao saír do rezo de shabat nunha sinagoga do asentamento colono de Neve Yaakov. Outras tres persoas quedaron feridas de gravidade.
As autoridades israelís decretaron o estado de máxima alerta e a Policía xa arrestou 42 persoas sospeitosas de colaborar ou estar ao corrente deste crime, que se produciu no medio doutra escalada de violencia na zona.
"O comisionado de Policía, o superintendente xefe Yaakov Shabtai, ordenou aumentar a alerta ao máis alto nivel. Desde esta mañá, os oficiais traballan quendas de 12 horas", indicou nun comunicado a Policía.
Ademais, solicitou á poboación que "informe de calquera persoa ou obxecto sospeitoso".
O mais mortífero dende 2011
Trátase do atentado máis mortífero desde 2011, cando un grupo armado cruzou a Israel desde a península exipcia do Sinaí e matou oito israelís.
O primeiro ministro, Benjamín Netanyahu, e o seu ministro de Seguridade Nacional, o colono extremista e antiárabe Itamar Ben Gvir, acudiron ao lugar dos feitos pero sen facer declaracións á prensa.
As autoridades consideran que o ataque foi unha represalia á violenta incursión do Exército israelí o xoves en Yenín, norte da Cisxordania ocupada, que derivou en fortes choques con milicias armadas. Nove palestinos morreron neses enfrontamentos, tamén os máis letais dos últimos anos.
