Ucraína retira as súas tropas da cidade de Avdivka, na provincia de Donetsk
Ucraína retira as súas tropas da cidade de Avdivka, na provincia de Donetsk
É a principal vitoria de Rusia nun ano
Putin felicita o Exército pola conquista
Ucraína anunciou a retirada das súas tropas da cidade oriental de Avdivka ante o avance das forzas rusas e as voces, cada vez máis fortes dentro do Exército ucraíno, sobre a imposibilidade de manter esta fronte.
"Tendo en conta a situación operativa ao redor de Avdivka, para evitar o cerco e preservar a vida e a saúde dos militares, decidín retirar as nosas unidades da cidade e pasar á defensa en liñas máis favorables", escribiu o novo comandante en xefe das Forzas Armadas de Ucraína, Oleksandr Sirski, na súa conta de Facebook.
Segundo o comandante, os soldados ucraínos "cumpriron con dignidade o seu deber militar, fixeron todo o posible para destruír as mellores unidades militares rusas e inflixiron perdas significativas ao inimigo en termos persoal e equipo".
A cidade era un dos principais bastións na rexión de Donetsk e un dos obxectivos máis cobizados do Exército ruso tras facerse con Bajmut e Márinka. Controlada por Rusia desde 2014, sufrira asaltos intensos das tropas do Kremlin desde outubro pasado.
Nos últimos días, Ucraína enviara reforzos a esta fronte, pero os comandantes das brigadas que loitaban en Avdivka recoñeceron que era difícil manter o control da cidade porque Rusia mandaba cada vez máis unidades ao combate e tentaba cortar as liñas de subministración e comunicación.
O presidente de Ucraína, Volodimir Zelenski, dixo que as accións das tropas do seu país na fronte só están limitadas pola falla de munición e mísiles de longo alcance de Occidente, o que permite a Rusia adaptarse á situación no campo de batalla.
Felicitación de Putin
O presidente de Rusia, Vladimir Putin, felicitou o Exército ruso pola conquista do bastión de Avdivka, no leste de Ucraína, segundo informou o Ministerio de Defensa ruso nun comunicado.
"Gloria eterna aos heroes caídos en combate", reza a mensaxe presidencial.
Tamén o xefe da rexión de Donetsk imposto por Moscova, Denís Pushilin, agradeceulle ao Exército ruso a toma do bastión ucraíno, situado a poucos quilómetros da capital rexional do mesmo nome e controlada por Moscova desde 2014.
"En nome de todos os habitantes do Donbás, agradezo ás nosas tropas, o noso exército e o noso presidente polo feito de que a república popular de Donetsk continúe liberándose e Avdivka estea connosco", escribiu na súa conta de Telegram.
Mentres, o Ministerio de Defensa de Rusia destacou que só unhas poucas formacións ucraínas lograron abandonar Avdivka, "abandonando as súas armas e o equipo militar".