Tui celebra o 800 aniversario da consagración da súa catedral e inicia o ano xubilar

Tui celebra o 800 aniversario da consagración da súa catedral. O arcebispo de Santiago presidiu este mediodía a eucaristía concelebrada polo bispo diocesano, o emérito tudense e o metropolitano de Braga. Actos culturais, relixiosos e divulgativos marcan a celebración coa apertura do ano xubilar.

Os actos conmemorativos comezaron coa apertura para a exhibición extraordinaria do altar das reliquias, unha das xoias do monumento, que só se mostra no día do patrón, san Telmo, segundo explica Alberto Montes, delegado de prensa da diocese de Tui-Vigo.

Deseguido comezou a eucaristía, oficiada polo arcebispo de Compostela, coa que comeza o ano xubilar. Os reis de España e o presidente da República Portuguesa presiden o comité de honra. Presencialmente acudiron diversas autoridades de Galicia e do veciño Portugal. A misa é o acto central desta efeméride, que conmemora o oitavo centenario da consagración da catedral tudense, explica Francisco José Prieto, arcebispo de Santiago.

O acto rematou con música e os discursos, que salientaron os vínculos transfronteirizos entre galegos e portugueses ao longo da historia coa catedral como referente completaron o programa do evento.