Trump publica unha imaxe súa manipulada como "presidente interino de Venezuela"

O presidente estadounidense, Donald Trump, publicou este domingo en Truth Social unha imaxe manipulada do seu perfil en Wikipedia, na que se atribúe o cargo de "presidente interino de Venezuela" a data de xaneiro de 2026.

Faino nove días despois de ter capturado a Nicolás Maduro e a súa dona, Cilia Flores, nunha operación militar estadounidense en Caracas. Ambos permanece encarcerados en Nova York acusados de narcotráfico e corrupción.

Este domingo, o mandatario afirmou que espera visitar Venezuela e reunirse coa presidenta encargada, Delcy Rodríguez, "nalgún momento".

En declaracións aos xornalistas a bordo do avión presidencial, reiterou as súas ameazas a Rodríguez e asegurou que, "se non coopera cos EUA, "probablemente afrontaría unha situación como a de Maduro".

Trump afirmou que, cando o foron prender, Maduro levantou a súa man e rendeuse, declarando que era "o correcto", e non quixo revelar a información que recibiu sobre a primeira noite do líder chavista no centro penal de Brooklyn, coñecido polas súas duras condicións.

O presidente norteamericano expresou a súa confianza no xuíz que supervisa o caso contra Maduro, Alvin Hellerstein, de 92 anos. "O caso é infalible", afirma o mandatario, quen acusa o expresidente venezolano de narcoterrorismo e responsabilízao da morte de "millóns e millóns de persoas".

O senador republicano Linsey Graham, presente no avión, indicou que Maduro "elixiu desafiar a Trump e o Exército estadounidense e o seu traseiro está no cárcere, onde merece estar".

Venezuela tenta recuperar a normalidade nove días despois da captura de Maduro

Nove días despois da captura de Nicolás Maduro o país tenta recuperar a normalidade. Este luns o alumnado volve ás clases. O Goberno ordenou que se reforcen as patrullas policiais para garantir a seguridade do estudantado. Mentres, esta fin de semana houbo manifestacións para pedir a liberación de Nicolás Maduro. O seu fillo asegura que están ben e que seguirán loitando.

No outro bando, os familiares dos presos políticos seguen á espera de máis excarceracións. Din que van a contagotas e temen que haxa máis mortos despois de que o sábado falecera un policía arrestado.

Trump tamén avanza nos plans sobre o petróleo. Quere deixar a Exxón fóra de Venezuela, despois de que a petroleira cualificara o país como imposible para investir. E lanza un ultimato a Cuba.  Tras advertilos que non recibirán máis petróleo nin diñeiro de Venezuela, ínstaos a chegar a un acordo antes de que sexa tarde. E o Goberno cubano respondeu que están dispostos a defender a patria ata a última gota de sangue. ​​​