Trump, protagonista de novo nos documentos do caso Epstein

O nome do presidente dos Estados Unidos, Donald Trump, aparece mencionado repetidamente nunha nova partida de documentos sobre o pederasta Jeffrey Epstein, publicada polo Departamento de Xustiza, que advertiu que algúns deses arquivos conteñen "acusacións falsas" sobre o republicano vertidas xusto antes das presidenciais de 2020.

Entre os miles de novos documentos abundan principalmente correos electrónicos nos que diferentes persoas enlazan noticias, principalmente políticas, sobre Trump, aínda que tamén aparecen outras mencións relacionadas, por exemplo, coas viaxes que realizou no avión privado de Epstein.

Trump, voou "moitas máis veces" do que inicialmente se cría a bordo do avión privado do pederasta Jeffrey Epstein, segundo afirma un fiscal federal nun dos documentos.

"Para a súa información, queriamos comunicarlles que os rexistros de voo que recibimos onte reflicten que Donald Trump viaxou no 'jet' privado de Epstein moitas máis veces do que se informou anteriormente (ou do que tiñamos coñecemento)", escribe. 

Os documentos mesmo recollen o testemuño de alguén que menciona unha muller que asegurou ser violada polo hoxe presidente dos Estados Unidos.

O Departamento de Xustiza afirmou nun comunicado que varios destes documentos recentemente publicados "conteñen acusacións falsas e sensacionalistas contra o presidente Trump, presentadas ao FBI xusto antes das eleccións de 2020".

"Cabe aclarar que estas acusacións carecen de fundamento e son falsas, e se tivesen a menor credibilidade, sen dúbida xa se utilizarían na súa contra", engade o texto.

Un dos documentos é unha declaración ao FBI, recollida o 27 de outubro de 2020, dunha persoa que asegura que traballou como condutor de limusinas na zona de Dallas e que asegurou levar a Trump, no ano 1995, ao aeroporto de Fort Worth (Texas).

O condutor relatou a unha coñecida súa este encontro con Trump e contou que entón o comportamento dela cambiou de inmediato e que entón a muller asegurou que "Donald J. Trump a violara xunto con Jeffrey Epstein", e que unha moza "cun nome estraño" a levou "a un hotel ou edificio luxoso", e que "así foi como sucedeu".