Trump, imputado por tentar alterar o resultado das eleccións do 2020

O expresidente de Estados Unidos Donald Trump (2017-2021) foi imputado este martes de catro cargos por supostamente tentar reverter o resultado das eleccións de 2020, en que perdeu fronte ao demócrata Joe Biden.

O fiscal especial Jack Smith anunciou este martes que tentará que se celebre un xuízo rápido contra Trump, acusado de catro cargos polo asalto ao Capitolio de 2021. 

"O meu equipo buscará que se celebre un xuízo rápido para que as nosas probas poidan ser probadas ante un tribunal e xulgadas por un xurado de cidadáns", dixo o fiscal nunha breve comparecencia ante a prensa. Mentres tanto, agregou Smith, Trump "debe presumirse inocente ata que se probe a súa culpabilidade nun tribunal".

O fiscal advertiu ademais de que a investigación sobre outros individuos que participaron no intento de reverter a vontade popular continúa.

Na súa comparecencia, Smith leu os catro delitos dos que se acusa a Trump e que figuran nun escrito de acusación de 45 páxinas: conspiración para defraudar aos EUA, conspiración para obstruir un procedemento oficial, obstrución e intento de obstruir un procedemento oficial e conspiración contra dereitos.

"O obxectivo da conspiración foi reverter os resultados lexítimos das eleccións presidenciais de 2020 utilizando a conciencia consignas falsas dunha fraude para obstruir a función do Goberno federal de colleitar, contar e certificar os resultados", reza o texto.

Smith dixo que o asalto ao Capitolio do 6 de xaneiro de 2021 por parte dunha turba de trumpistas que tentou frear a ratificación dos resultados electorais foi "un ataque sen precedentes á sede da democracia estadounidense".

Denunciou que o asalto "foi alimentado por mentiras" de Trump co obxectivo de "obstruír" as funcións de reconto e certificación das eleccións presidenciais". Así mesmo, agradeceu o traballo dos policías que defenderon o Capitolio, a quen cualificou de "heroes" e "patriotas".

"Non só defenderon un edificio ou as persoas que había dentro. Arriscaron as súas vidas para defender quen somos como país e como pobo", remarcou.

Smith investiga tamén a Trump por subtraer de forma ilegal documentos clasificados da Casa Branca e retelos na súa mansión de Mar-a-Lago, en Florida, caso polo que o republicano foi acusado de 40 cargos. 

O gran xurado acúsao de esparexer "mentiras" de que houbo unha fraude electoral en 2020 que determinou o resultado dos comicios e de que el gañara: "Estas afirmacións foron falsas, o acusado sabía que eran falsas", apunta o texto.

No documento tamén se sinala que Trump levou a cabo supostos esforzos para impugnar de forma legal o resultado das eleccións, que resultaron infrutuosos, á vez que tamén usou métodos "ilegais" para que non se contasen votos emitidos legalmente para reverter o resultado dos comicios.

"O acusado repetiu afirmacións falsas de fraude electoral, deu falsas esperanzas de que o vicepresidente (Mike Pence) podería cambiar o resultado das eleccións e dirixiu a unha multitude enfronte del para que se dirixise ao Capitolio", indica o escrito de acusación.

Na imputación descríbense os esforzos que Trump desenvolveu para reverter o resultado electoral desde o día dos comicios, o 3 de novembro de 2020, ata despois do 6 de xaneiro de 2021 cando unha turba dos seus seguidores irrompeu no Capitolio cando o Congreso estaba reunido para confirmar a vitoria de Biden nos comicios.

O gran xurado que todas esas artimañas foron medios para obstruír a certificación de Biden como presidente ante o Congreso e unha maneira de presionar ao que foi vicepresidente de Trump, Mike Pence, que o 6 de xaneiro actuou como xefe da Cámara Alta para que obstruíse "de forma fraudulenta" a ratificación do demócrata.

A campaña de Trump acusa o fiscal especial de ser "o executor" da familia Biden

A campaña de Donald Trump para as eleccións presidenciais de 2024 acusou este martes ao fiscal especial Jack Smith, de ser "o executor da familia criminal" do presidente estadounidense, Joe Biden.

"A boa noticia é que o presidente Trump non se deixa intimidar e o seu movemento America First sen precedentes levarao de regreso á Casa Branca, onde desmantelará o Estado Profundo e levará á familia criminal Biden ante a xustiza", dixo nun comunicado a portavoz da campaña Karoline Leavitt.

Ademais, o grupo acusou a Biden e aos seus achegados de lucrarse "vendendo acceso ao Partido Comunista Chinés, Ucraína e outras nacións estranxeiras".

Os medios adiantaron que o expresidente estadounidense deberá comparecer ante un tribunal de Washington o vindeiro xoves ád 16.00 horas local.

Actualmente Trump é o candidato favorito, segundo as sondaxes, para facerse co nomeamento republicano para as eleccións presidenciais de 2024. Unha nova imputación contra el non impediría que o exmandatario concorrese aos comicios.

O propio Trump avanzou a través da súa rede social que a imputación estaba ó caer. E volvía
arremeter contra o fiscal especial que leva o caso: acusouno de novo de pretender interferir nas presidencias do próximo ano. Preguntouse porque esperaron ata agora para imputalo e el mesmo respondeu: porque querían facelo en metade da súa campaña para facerse coa candidatura republicana. As últimas enquisas ségueno situando como o favorito da militancia.

É a terceira imputación para el e a de maior gravidade.