Trump dá "10 ou 12 días" a Putin para chegar a un acordo de cesamento do fogo con Ucraína

O presidente estadounidense, Donald Trump, dixo que fará un anuncio oficial sobre a redución do prazo que deu ao seu homólogo ruso, Vladímir Putin, para chegar a un acordo de cesamento do fogo con Ucraína "a 10 ou 12 días".

O mandatario estadounidense lamentou que "non quere facerlle iso" a Rusia porque "ama a xente rusa", ao comparecer ante a prensa antes de reunirse no seu complexo de golf de Turnberry (oeste de Escocia) co primeiro ministro británico, Keir Starmer. 

"Non hai razón para esperar. Non estamos a ver ningún progreso", dixo sentado xunto ao líder laborista.

Á entrada das instalacións, Trump mostrouse ademais "decepcionado" con Putin porque, ao termo das "catro ou cinco" conversacións que mantivo con el e sostivo que reduciría ese prazo que lle anunciou o pasado 14 de xullo e que comezou o 22 do mesmo mes.

"Vou reducir eses 50 días que dei a un número inferior, porque creo que xa sei a resposta do que vai pasar", dixo.

Trump, como xa afirmou noutras ocasións, mostrouse decepcionado coa actitude de Putin porque, tras manter conversacións volve atacar, "mata unha chea de xente nunha residencia ou onde sexa, e deixa corpos tirados por toda a rúa".

"Realmente nunca pensei que se chegaría a esta situación. Pensaba que sería posible negociar algo. E posiblemente ocorra, pero é moi tarde no proceso", engadiu.

O xefe da oficina presidencial ucraína, Andrí Yermak, agradeceu ao presidente estadounidense que vaia acurtar o prazo de 50 días que deu hai dúas semanas ao seu homólogo ruso para que acceda a asinar un acordo de paz.

"Grazas ao presidente dos EUA por manterse firme e dar unha mensaxe clara de paz a través da forza", dixo Yermak.

As negociacións entre as delegacións rusa e ucraína retomáronse o pasado 23 de xullo en Istambul, coa proposta da parte rusa de crear grupos de traballo que operarían en liña, ao que Ucraína aínda non respondeu.